بولان میں پولیس چوکی پر دہشت گردوں کا حملہ، بلوچستان پولیس کا اہلکار ہلاک

کوئٹہ (نمائندہ ڈیلی اردو) پاکستان کے شورش زدہ صوبہ بلوچستان کے ضلع بولان میں نامعلوم مسلح دہشت گردوں نے پولیس چوکی پر حملہ کردیا، جس کے نتیجے میں ڈیوٹی پر مامور بلوچستان پولیس کا ایک اہلکار ہلاک ہوگیا۔

پولیس کے مطابق واقعہ ضلع بولان کے علاقے بالاناڑی میں نیشنل ہائی وے پر واقع دوسہ کراس پولیس چوکی پر پیش آیا، جہاں رات گئے نامعلوم مسلح دہشت گردوں نے اچانک حملہ کیا۔

پولیس حکام کے مطابق حملے کے وقت اہلکار معمول کے مطابق چوکی پر اپنے فرائض انجام دے رہے تھے۔ دہشت گردوں کی فائرنگ کے نتیجے میں پولیس اہلکار حافظ عبدالرشید ابڑو شدید زخمی ہوئے اور زخموں کی تاب نہ لاتے ہوئے ہلاک ہوگئے۔

واقعے کی اطلاع ملتے ہی پولیس اور سکیورٹی اداروں کی بھاری نفری فوری طور پر جائے وقوعہ پر پہنچ گئی۔ اہلکاروں نے علاقے کو گھیرے میں لے کر حملہ آوروں کی تلاش شروع کردی جبکہ جائے وقوعہ سے شواہد بھی اکٹھے کیے گئے۔

پولیس کے مطابق ہلاک اہلکار کی میت ضروری قانونی کارروائی مکمل کرنے کے بعد آبائی علاقے روانہ کردی گئی۔

واقعے کے بعد پولیس اور سکیورٹی فورسز نے علاقے میں سرچ آپریشن شروع کردیا ہے، جبکہ حملے میں ملوث دہشت گردوں کا سراغ لگانے کے لیے مختلف مقامات کی تلاشی لی جا رہی ہے۔

سکیورٹی حکام کا کہنا ہے کہ حملہ آوروں کی گرفتاری کے لیے علاقے کے داخلی و خارجی راستوں کی نگرانی بھی سخت کردی گئی ہے۔

پولیس نے واقعے کی تحقیقات شروع کردی ہیں اور حملے کے محرکات، دہشت گردوں کی تعداد اور ان کی شناخت کے حوالے سے شواہد اکٹھے کیے جا رہے ہیں۔

بلوچستان میں حالیہ عرصے کے دوران پولیس، سکیورٹی فورسز اور دیگر سرکاری تنصیبات پر دہشت گردوں کے حملوں میں اضافہ ہوا ہے۔ سکیورٹی اداروں کی جانب سے صوبے میں دہشت گردی کے خاتمے اور حملہ آوروں کے خلاف کارروائیاں جاری ہیں۔