بھارت نے نقصانات کا اعتراف شروع کردیا، 3 جنگی طیارے بھارتی حدود میں گر کر تباہ

نئی دہلی (ڈیلی اردو رپورٹ) بھارت نے بالآخر اپنے لڑاکا طیاروں کے نقصانات کا جزوی اعتراف کر لیا ہے۔ بھارتی میڈیا کے مطابق تین بھارتی جنگی طیارے بھارت کی سرزمین پر گر کر تباہ ہو گئے ہیں۔

بھارتی نشریاتی ادارے انڈیا ٹی وی نے رپورٹ کیا ہے کہ یہ تینوں حادثات بھارتی فضائی حدود کے اندر پیش آئے۔ ابتدائی طور پر حادثات کی وجوہات کے بارے میں واضح معلومات فراہم نہیں کی گئیں تاہم دفاعی تجزیہ کاروں کا کہنا ہے کہ یہ نقصان پاکستان کی جوابی کارروائی کا نتیجہ ہو سکتا ہے۔

یاد رہے کہ گزشتہ روز پاکستان کے وزیر دفاع خواجہ محمد آصف نے بلومبرگ کو دیے گئے انٹرویو میں دعویٰ کیا تھا کہ پاکستان نے پانچ بھارتی لڑاکا طیارے اور متعدد ڈرونز مار گرائے ہیں۔ بھارتی حکومت نے ان دعوؤں پر باضابطہ تبصرہ نہیں کیا تھا، تاہم اب تین طیاروں کے گرنے کی بھارتی تصدیق نے کئی سوالات کھڑے کر دیے ہیں۔

دوسری جانب بھارتی فوجی حکام ان واقعات کو “تکنیکی خرابی” یا “معمولی حادثات” قرار دے رہے ہیں، لیکن زمینی حقائق اور حالیہ کشیدگی کے تناظر میں ان وضاحتوں پر شکوک و شبہات بڑھ رہے ہیں۔

ڈیلی اردو اس پیشرفت پر نظر رکھے ہوئے ہے۔ مزید تفصیلات اور مصدقہ معلومات کے لیے ہمارے ساتھ جڑے رہیے۔