بین الاقوامی پابندیوں کی فہرست میں شامل سابق شامی جنرل طارتوس سے گرفتار

دمشق(ڈیلی اردو) شام کے صوبہ طارتوس میں داخلی سکیورٹی فورسز نے کارروائی کرتے ہوئے سابق حکومت کے فوجی افسر میجر جنرل محمد علی درغام کو گرفتار کرلیا۔

داخلی سکیورٹی فورسز کے مطابق محمد علی درغام کو نگرانی اور مسلسل پیروی کے بعد انسداد دہشتگردی کے ادارے کے تعاون سے گرفتار کیا گیا۔ حکام کا کہنا ہے کہ درغام سابق شامی حکومت کے دور میں فوجی نظام کے اہم افسران میں شمار ہوتا تھا اور اس نے مختلف حساس عسکری عہدوں پر خدمات انجام دیں۔

سکیورٹی حکام کے مطابق فوجی ریکارڈ میں درغام کی عسکری ذمہ داریوں کا آغاز 1982 میں حماہ کے واقعات کے دوران سرايا الدفاع میں ایک دستے کی کمان سے ہوا۔ بعد ازاں وہ 2009 سے 2013 تک چوتھی ڈویژن کی فیلڈ کمان سے وابستہ رہا، جس کے بعد پانچویں ڈویژن کے نائب کمانڈر کی ذمہ داری سنبھالی۔

حکام کے مطابق محمد علی درغام بعد میں دوسری کور کی کمان بھی کرتا رہا اور 2018 کے اواخر تک اس عہدے پر فائز رہا۔

داخلی سکیورٹی فورسز کا کہنا ہے کہ ابتدائی تحقیقات اور دستیاب ریکارڈ میں درغام پر دمشق کے دیہی علاقوں میں مظاہرین پر فائرنگ کے احکامات جاری کرنے، چھاپہ مار کارروائیوں اور بڑے پیمانے پر گرفتاریوں کی نگرانی سمیت سنگین الزامات عائد کیے گئے ہیں۔

حکام کے مطابق محمد علی درغام کا نام ماضی میں سنگین انسانی حقوق کی خلاف ورزیوں کے الزامات کے باعث بین الاقوامی پابندیوں کی فہرست میں بھی شامل کیا جا چکا ہے۔

سکیورٹی فورسز نے بتایا کہ گرفتار افسر سے متعلق تحقیقات جاری ہیں، جن کا مقصد اس پر عائد الزامات اور واقعات سے متعلق مزید شواہد اکٹھے کرنا ہے۔ تحقیقات مکمل ہونے کے بعد اسے قانونی کارروائی کے لیے متعلقہ عدالت میں پیش کیا جائے گا۔

یہ گرفتاری ایسے وقت میں سامنے آئی ہے جب داخلی سکیورٹی فورسز نے چند روز قبل سابق شامی حکومت کے 18ویں انفنٹری بریگیڈ کے کمانڈر میجر جنرل جلال کامل صقر کو بھی گرفتار کیا تھا۔ حکام کے مطابق اس پر بھی شہریوں کے خلاف جنگی جرائم اور جبری گرفتاریوں میں ملوث ہونے کے الزامات ہیں۔