تحریک طالبان پاکستان میں شامل 70 فیصد جنگجو افغان ہیں، فیلڈ مارشل عاصم منیر

اسلام آباد (ڈیلی اردو) چیف آف ڈیفنس فورسز اور آرمی چیف فیلڈ مارشل عاصم منیر نے کہا ہے کہ کالعدم تحریک طالبان پاکستان (ٹی ٹی پی) کے پاکستان میں دراندازی کرنے والے جنگجوؤں میں 70 فیصد افغان شامل ہوتے ہیں۔

انہوں نے یہ بات 10 دسمبر کو اسلام آباد میں منعقدہ نیشنل علما کانفرنس سے خطاب کے دوران کہی، تاہم ان کے خطاب کی مکمل تفصیلات تاحال سامنے نہیں آ سکیں اور تقریر کے چند کلپس آج ٹی وی چینلز پر نشر کیے گئے۔

فیلڈ مارشل عاصم منیر نے کہا کہ پاکستان بارہا افغان حکومت سے مطالبہ کرتا رہا ہے کہ افغان سرزمین کو پاکستان میں دہشت گردی کے لیے استعمال ہونے سے روکا جائے، تاہم کابل ان الزامات کی تردید کرتا رہا ہے۔

انہوں نے سوال اٹھایا کہ کیا افغانستان ہمارے پاکستانی بچوں کا خون نہیں بہا رہا؟ اور یاد دلایا کہ افغان طالبان کو واضح طور پر کہا گیا تھا کہ وہ پاکستان اور ٹی ٹی پی میں سے کسی ایک کا انتخاب کریں۔

بھارت کے ساتھ مئی میں ہونے والی چار روزہ کشیدگی کا ذکر کرتے ہوئے آرمی چیف نے کہا کہ آپریشن بنیان مرصوص کے دوران مسلح افواج کو غیبی مدد حاصل ہوئی، جسے انہوں نے خود محسوس کیا۔

ان کے مطابق 7 مئی کو بھارت کے حملوں کے بعد دونوں ممالک کے درمیان شدید فوجی تصادم ہوا، جس میں درجنوں افراد ہلاک ہوئے، بعد ازاں جنگ بندی پر اتفاق کیا گیا۔

فیلڈ مارشل عاصم منیر نے زور دیا کہ کسی اسلامی ریاست میں جہاد کا اعلان صرف ریاست کا اختیار ہے، اور کسی فرد یا گروہ کو یہ حق حاصل نہیں کہ وہ ریاست کی اجازت کے بغیر جہاد کا فتویٰ دے۔

انہوں نے اپنے خطاب میں قرآنِ پاک کی متعدد آیات کا حوالہ بھی دیا۔