تربت میں ایف سی کیمپ پر راکٹ حملہ، فائرنگ کے تبادلے میں بی ایل اے کے 2 شدت پسند ہلاک

کوئٹہ (بیورو رپورٹ) صوبہ بلوچستان کے شہر تربت میں کالعدم بلوچ لبریشن آرمی (بی ایل اے) کے مسلح شدت پسندوں اور سیکیورٹی اداروں کے درمیان فائرنگ کا تبادلہ ہوا، جس کے نتیجے میں دو شدت پسند ہلاک ہو گئے۔

ڈیلی اردو کے مطابق سیکیورٹی ذرائع نے بتایا کہ تربت میں کالعدم تنظیم کے مسلح افراد نے رات گئے فرنٹیئر کانسٹیبلری (ایف سی) کی چیک پوسٹ پر چار راکٹ داغے، جس کے بعد سیکیورٹی اداروں نے فوری طور پر علاقے میں ملزمان کی تلاش شروع کی۔ اس دوران آمنا سامنا ہونے پر دونوں جانب سے فائرنگ کا تبادلہ ہوا جس میں بی ایل اے سے تعلق رکھنے والے دو شدت پسند مارے گئے، جبکہ ایک ایف سی اہلکار زخمی ہوا، جسے طبی امداد کے لیے اسپتال منتقل کر دیا گیا۔

فائرنگ کے بعد جائے وقوع پر پولیس، لیویز، محکمہ انسداد دہشت گردی (سی ٹی ڈی) اور ایف سی حکام پہنچ گئے۔

ذرائع کے مطابق ہلاک شدت پسندوں میں ایک کی شناخت صبراللہ کے نام سے ہوئی ہے، جو سنگانی سر کا رہائشی تھا۔ ایف سی کی چیک پوسٹ پر حملے کے بعد فورسز نے سنگانی سر میں ایک گلی میں ان دہشت گردوں کو گھیر کر ہلاک کیا۔

ہلاک شدت پسندوں سے بھاری مقدار میں اسلحہ برآمد ہوا ہے، جسے سرکاری تحویل میں لے لیا گیا ہے۔