تہران میں محسن نقوی کی عباس عراقچی سے ملاقات، علاقائی صورتحال پر تبادلہ خیال

تہران(ڈیلی اردو) پاکستان کے وزیر داخلہ سید محسن نقوی ایران کے دارالحکومت تہران پہنچ گئے، جہاں ایرانی وزیر داخلہ اسکندر مومنی نے ہوائی اڈے پر ان کا استقبال کیا۔

دورۂ ایران کے دوران محسن نقوی نے ایرانی وزیر خارجہ عباس عراقچی سے ملاقات کی۔ دونوں رہنماؤں کے درمیان خطے کی موجودہ صورتحال، علاقائی و عالمی پیش رفت اور امن و استحکام سے متعلق کوششوں پر گفتگو ہوئی۔

ملاقات میں پاکستان اور ایران کے دوطرفہ تعلقات سمیت باہمی دلچسپی کے مختلف امور بھی زیرِ بحث آئے۔ ذرائع کے مطابق پاکستانی وزیر داخلہ دورے کے دوران ایرانی حکام سے مزید ملاقاتیں بھی کریں گے۔

محسن نقوی کا یہ دورہ ایسے وقت میں ہو رہا ہے جب گزشتہ ماہ ایرانی وزیر داخلہ اسکندر مومنی نے اسلام آباد کا دورہ کیا تھا اور پاکستانی حکام سے دوطرفہ امور پر بات چیت کی تھی۔

پاکستان حالیہ عرصے میں ایران اور امریکا کے درمیان کشیدگی کم کرنے کے لیے سفارتی سطح پر رابطوں اور مفاہمتی کوششوں میں بھی کردار ادا کرتا رہا ہے۔ خطے کی صورتحال اور آبنائے ہرمز سے متعلق معاملات بھی دونوں ممالک کے درمیان اہم موضوعات میں شامل ہیں۔