جرمنی میں چاقو حملہ، 3 افراد ہلاک، 3 حالت تشویشناک

برلن (ڈیلی اردو رپورٹ) جرمنی کے شہر بیلیفیلڈ میں اتوار کی صبح ایک بار کے باہر چاقو حملے میں تین افراد ہلاک اور چھ زخمی ہو گئے، جن میں سے تین کی حالت تشویشناک بتائی جا رہی ہے۔ یہ واقعہ 18 مئی کو صبح 4:20 بجے پیش آیا، جب لوگ مقامی فٹبال کلب آرمینیا بیلیفیلڈ کی جیت کا جشن منا رہے تھے۔

پولیس کے مطابق، حملہ ایک 35 سالہ شامی نژاد شخص نے کیا، جس نے اچانک تیز دھار آلے سے بلا امتیاز افراد پر حملہ کر دیا۔ کچھ افراد نے مزاحمت کرتے ہوئے حملہ آور کو زخمی کیا، تاہم وہ موقع سے فرار ہونے میں کامیاب ہو گیا۔

پولیس نے جائے وقوعہ سے متعدد چاقو اور ایک بیگ برآمد کیا ہے، جس میں ذاتی دستاویزات اور ایک پٹرول کی بو والی بوتل بھی موجود تھی۔ حکام کا کہنا ہے کہ شواہد سے حملے کے منصوبہ بند ہونے کا اشارہ ملتا ہے۔

حملہ آور کی تلاش جاری ہے اور پولیس نے شہریوں سے اپیل کی ہے کہ وہ مشتبہ شخص سے فوری طور پر دور رہیں اور پولیس کو اطلاع دیں، کیونکہ وہ مسلح اور خطرناک ہو سکتا ہے۔

بیلیفیلڈ پولیس نے عوام سے واقعے کی ویڈیوز، تصاویر یا دیگر شواہد فراہم کرنے کی اپیل کی ہے تاکہ ملزم کی شناخت اور گرفتاری ممکن بنائی جا سکے۔ واقعے کی مزید تحقیقات جاری ہیں۔