جنوبی وزیرستان میں دھماکا، 3 سیکیورٹی اہلکار ہلاک، 7 شدید زخمی

اسلام آباد (ش ح ط) صوبہ خیبر پختونخواہ کے قبائلی ضلع جنوبی وزیرستان میں حکام کے مطابق ایک ریموٹ کنٹرول بم دھماکے میں تین سکیورٹی اہلکار ہلاک اور سات شدید زخمی ہو گئے ہیں۔ مزید ہلاکتوں کا خدشہ ہے۔

سیکیورٹی ذرائع کے مطابق وانا بائی پاس پر سپین جماعت کے ساتھ 30 کیولری کی کانوائی پر دھماکا ہوا ہے جس میں تین اہلکار شہید اور جبکہ 7 زخمی ہوئے ہیں۔

ہلاک ہونے والوں میں نائب صوبیدار سراج، لانس نائیک میر محمد اور سپاہی شمس شامل ہیں جبکہ زخمیوں میں حولدار سید محمد، لانس نائیک ثاقب، لانس نائیک زاہد، لانس نائیک ندیم، سپاہی صفدر، سپاہی سالار اور سپاہی خالد شامل ہیں۔

واقعے کے بعد سکیورٹی فورسز نے علاقے کو گھیرے میں لے کر سرچ آپریشن شروع کردیا ہے اور ہلاک اور زخمی اہلکاروں کو سی ایم ایچ ہسپتال منتقل کردیا ہے۔

جنوبی وزیرستان میں سکیورٹی فورسز پر حملے کے بعد عام طور پر علاقے میں کرفیو نافذ کر دیا گیا ہے۔

دوسری جانب کالعدم تنظیم تحریک طالبان پاکستان (ٹی ٹی پی) نے حملے کی ذمہ داری قبول کرلی ہے۔

جنوبی وزیرستان میں اس سے پہلے بھی سیکیورٹی اہلکاروں کو متعدد بار بم دھماکوں میں نشانہ بنایا جا چکا ہے۔

واضح رہے کہ گذشتہ دو ہفتوں سے شمالی اور جنوبی وزیرستان میں شدت پسندوں نے سیکیورٹی فورسز پر حملوں میں تیزی لائی ہے اور دو ہفتوں کے دوران یہ چوتھا حملہ ہے، جس میں اب تک دس سے زائد سکیورٹی اہلکار ہلاک جبکہ 15 سے زیادہ زخمی ہوئے ہیں۔