جنوبی وزیرستان میں مبینہ کواڈ کاپٹر حملہ، 2 بچے زخمی

وانا(ڈیلی اردو) خیبرپختونخواہ کے شورش زدہ قبائلی ضلع جنوبی وزیرستان لوئر کی تحصیل برمل کے علاقے اعظم ورسک نارگاسئی میں مبینہ کواڈ کاپٹر ڈرون حملے کے نتیجے میں دو بچے زخمی ہوگئے۔

ہسپتال ذرائع کے مطابق زخمی بچوں کی شناخت عیان ولد خلیل الرحمن اور ادانہ ولد خلیل الرحمن کے نام سے ہوئی ہے۔ دونوں بچوں کو واقعے کے بعد فوری طور پر ڈسٹرکٹ ہیڈکوارٹر ہسپتال وانا منتقل کیا گیا، جہاں انہیں طبی امداد دی جا رہی ہے۔

پولیس ذرائع نے واقعے کی تصدیق کرتے ہوئے بتایا کہ واقعہ اعظم ورسک نارگاسئی میں پیش آیا۔ تاہم مبینہ ڈرون حملے میں کس نوعیت کا ہتھیار استعمال ہوا اور واقعہ کس طرح پیش آیا، اس حوالے سے مزید تفصیلات سامنے نہیں آسکیں۔

واقعے کے بعد علاقے میں خوف و تشویش کی فضا پائی جا رہی ہے، جبکہ مزید معلومات اور سرکاری مؤقف کا انتظار ہے۔