جنگ و جیو نیوز کے ایڈیٹر انچیف میر شکیل الرحمٰن جسمانی ریمانڈ پر نیب کے حوالے

لاہور (ڈیلی اردو) احتساب عدالت نے نوازشریف سے چون پلاٹس پر غیر قانونی رعایت حاصل کرنے کے الزام میں گرفتار جنگ و جیو نیوز کے ایڈیٹر انچیف میر شکیل الرحمٰن کو بارہ روزہ جسمانی ریمانڈ پر نیب کے حوالے کردیا ہے۔

تفصیلات کے مطابق نیب کی ٹیم میر شکیل الرحمٰن کو سخت سیکیورٹی میں احتساب عدالت لے کر پہنچی اور اس موقع پر عدالت کے اطراف بھی سیکیورٹی اور پولیس کی بھاری نفری تعینات تھی۔

عدالت نے فریقین کے دلائل سننے کے بعد جنگ گروپ کے ایڈیٹر انچیف میر شکیل الرحمٰن کا بارہ روز کا جسمانی ریمانڈ منظور کرتے ہوئے انہیں پچیس مارچ تک نیب کی تحویل میں دے دیا جب کہ عدالت نے کیس کی مزید سماعت پچیس مارچ تک ملتوی کردی۔

واضح رہے کہ نیب لاہور نے گذشتہ روز جنگ اور جیو کے مالک میر شکیل الرحمٰن کو گرفتار کیا تھا،ان پر نواز شریف سے چون پلاٹس پر غیرقانونی رعایت حاصل کرنے کا الزام ہے۔