جی ایچ کیو راولپنڈی میں مسلح حملہ آور کی داخلے کی کوشش، فائرنگ سے فوجی زخمی، حملہ آور ہلاک

راولپنڈی(ڈیلی اردو) پنجاب کے ضلع راولپنڈی میں سیکیورٹی فورسز نے  فائرنگ کے واقعے کے بعد کارروائی کرتے ہوئے ایک مسلح شخص کو ہلاک کردیا، جبکہ فائرنگ کے تبادلے میں ایک فوجی اہلکار زخمی ہوگیا، جسے طبی امداد کے لیے اسپتال منتقل کردیا گیا۔

ذرائع کے مطابق واقعہ مال روڈ کے علاقے میں پیش آیا، جہاں مسلح شخص  نے جنرل ہیڈکوارٹر (جی ایچ کیو ) میں داخلے کی کوشش کے دوران فائرنگ کی ۔ سیکیورٹی اہلکاروں نے فوری کارروائی کرتے ہوئے حملہ آور کو ہلاک کردیا۔

ہلاک ہونے والے شخص کی شناخت محمد حسین کے نام سے ہوئی ہے، جو ضلع خیبر کا رہائشی بتایا جاتا ہے۔ ذرائع کے مطابق ملزم کے قبضے سے اسلحہ، گولیاں، ایک سیاسی جماعت کا پرچم اور بعض دستاویزات برآمد ہوئی ہیں۔

ابتدائی اطلاعات میں ملزم کے سیاسی جماعت سے وابستہ ہونے کا دعویٰ بھی کیا گیا ہے، تاہم اس حوالے سے سرکاری سطح پر مزید تصدیق اور تحقیقات جاری ہیں۔