خالد خورشید نے گلگت بلتستان کے نئے وزیراعلیٰ کے عہدے کا حلف اٹھالیا

گلگت بلتستان (ڈیلی اردو) گلگت بلتستان کے نئے وزیراعلیٰ خالد خورشید نے عہدے کا حلف اٹھا لیا۔ گورنر راجہ جلال مقپون نے ان سے حلف لیا۔

حلف برداری کی تقریب گورنر ہاوس گلگت میں منعقد ہوئی جس میں نگران وزیراعلیٰ گلگت بلتستان، فورس کمانڈر گلگت بلتستان سمیت اعلیٰ عسکری حکام نے بھی شرکت کی۔ گلگت بلتستان اسمبلی میں وزیراعلیٰ کے انتخاب کیلئے گزشتہ روز 4 بجے پولنگ ہوئی تھی جس میں پی ٹی آئی کے بیرسٹر خالد خورشید 22 ووٹ لے کر وزیراعلیٰ گلگت بلتستان منتخب ہوئے۔

الحمداللّٰہ۔
گورنر ہاوس گلگت بلتستان میں اپنے عہدے کا حلف لیا۔ میں گلگت بلتستان کی عوام سے وعدہ کرتا ہوں کہ ہماری حکومت دن رات محنت کرے گی اور گزشتہ تمام تر محرومیوں کا ازالہ کرے گی۔ ہمارا ہر کام میرٹ کی بنیاد پہ ہوگا اور خطے کے ہر حصے کو یکسا ترقی کر راہ پر گامزن کریں گے۔ pic.twitter.com/QvqgRpAUX1

— Muhammad Khalid Khurshid Khan (@AbdulKhalidPTI) December 1, 2020

متحدہ اپوزیشن کی جانب سے امیدوار امجد حسین ایڈووکیٹ ان کے مقابلے میں صرف 9 ووٹ حاصل کر سکے تھے۔ نومنتخب وزیراعلی بیرسٹر خالد خورشید نے ابتدائی تعلیم گلگت اور گریجویشن فیصل آباد سے مکمل کی، بعد ازاں وہ لندن چلے گئے جہاں سے قانون کی ڈگری حاصل کی۔

انہوں نے 2018 میں تحریک انصاف میں شمولیت اختیار کی اور دیامر ڈویژن کے پارٹی صدر مقرر ہوئے تھے۔