خیبرپختونخوا: نوشہرہ میں ایکسائز موبائل سکواڈ پر فائرنگ، 3 اہلکار ہلاک، سب انسپکٹر شدید زخمی

نوشہرہ (نمائندہ ڈیلی اردو) خیبرپختونخوا کے ضلع نوشہرہ میں نامعلوم مسلح افراد نے ایکسائز موبائل سکواڈ پر فائرنگ کر دی، جس کے نتیجے میں دو کانسٹیبلز اور ایک ڈرائیور ہلاک جبکہ ایک سب انسپکٹر شدید زخمی ہو گیا۔

ایکسائز پولیس کے مطابق واقعہ جی ٹی روڈ پر تارو پبی کی حدود میں پیش آیا، جہاں ایکسائز انٹیلی جنس ٹیم پر فائرنگ کی گئی۔ ہلاک ہونے والوں میں کانسٹیبل افتخار، کانسٹیبل مجاہد اور ڈرائیور شامل ہیں، جبکہ سب انسپکٹر فاروق کو پانچ گولیاں لگیں جنہیں زخمی حالت میں اسپتال منتقل کر دیا گیا ہے۔

پولیس نے واقعے کا مقدمہ نامعلوم افراد کے خلاف درج کر کے تفتیش شروع کر دی ہے۔

چیف سیکریٹری خیبرپختونخوا نے واقعے کا نوٹس لیتے ہوئے رپورٹ طلب کر لی ہے اور کہا ہے کہ منشیات کے خلاف کارروائی کرنے والے اہلکاروں کی قربانیوں کو رائیگاں نہیں جانے دیا جائے گا۔ انہوں نے شہید اہلکاروں کو خراج عقیدت پیش کیا۔

وزیر اعلیٰ خیبرپختونخوا علی امین گنڈاپور نے بھی واقعے کی شدید مذمت کی ہے اور پولیس کو حملے میں ملوث عناصر کی فوری گرفتاری کی ہدایت کی ہے۔ انہوں نے شہداء کے اہل خانہ سے دلی ہمدردی اور زخمی اہلکار کی جلد صحت یابی کے لیے نیک خواہشات کا اظہار کیا۔

دوسری جانب ہلاک اہلکاروں اور ڈرائیور کی نمازِ جنازہ پولیس لائن پشاور میں ادا کی گئی، جس میں آئی جی خیبرپختونخوا ذوالفقار حمید، سی سی پی او، ایس ایس پی آپریشنز اور دیگر اعلیٰ افسران نے شرکت کی۔