خیبرپختونخوا: ٹانک میں دہشت گردوں کی پولیس وین پر فائرنگ، 2 اہلکار ہلاک، 3 زخمی

ٹانک (نمائندہ ڈیلی اردو) صوبہ خیبرپختونخوا کے ضلع ٹانک میں دہشت گردوں کے پولیس وین پر حملے میں 2 پولیس اہلکار ہلاک اور 3 زخمی ہوگئے جبکہ پولیس نے علاقے کو گھیرے میں لے کر سرچ آپریشن شروع کردیا۔

ڈی پی او ٹانک اسلم نواز خان نے ڈیلی اردو کو بتایا کہ ٹانک کے علاقے تھانہ ایس ایم اے کی حدود پٹھان کوٹ کے قریب پولیس وین معمول کے گشت پر تھی کہ نامعلوم مسلح دہشت گردوں نے فائرنگ کردی۔جس کے نتیجے میں پولیس اہلکار فرید زمان اور ایاز خان ہلاک ہوگئے۔

ڈی پی او اسلم نواز خان کے مطابق مسلح افراد کے حملے میں 3 پولیس اہلکار شدید زخمی بھی ہوئے ہیں جنہیں ڈسٹرکٹ ہیڈ کوارٹر ہسپتال منتقل کر دیا گیا ہے۔

پولیس حکام کا کہنا ہے کہ واقعے کے بعد پولیس نے علاقے کو گھیرے میں لے کر ملزمان کی تلاش کیلئے سرچ آپریشن شروع کردیا۔