خیبر: دہشت گردوں کی فائرنگ سے پولیس اہلکار اور اس کا کمسن بیٹا ہلاک

خیبر (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع خیبر کی تحصیل لنڈی کوتل کے علاقے سلطان خیل میں دہشت گردوں کی فائرنگ کے نتیجے میں پولیس اہلکار سپاہی سفیر خان آفریدی اور اس کا 7 سالہ بیٹا محمد طلحہ ہلاک ہو گئے۔

پولیس کے مطابق حملہ سپاہی سفیر خان کے حجرے کے سامنے ہوا، جس کے باعث وہ اور ان کا بیٹا شدید زخمی ہوئے۔ دونوں کو فوری طور پر حیات آباد میڈیکل کمپلیکس منتقل کیا گیا، جہاں زخموں کی تاب نہ لانے پر سپاہی اور اس کا بیٹا دورانِ علاج دم توڑ گئے۔

واقعے کے بعد علاقے میں سرچ آپریشن شروع کر دیا گیا ہے۔ پولیس نے تھانہ لنڈی کوتل میں نامعلوم دہشت گردوں کے خلاف مقدمہ درج کر کے ملزمان کی تلاش شروع کر دی ہے۔