خیبر میں فائرنگ سے قبائلی رہنما ہلاک، بنوں میں پولیس گاڑی پر دھماکہ

باڑہ + بنوں (نمائندگان ڈیلی اردو) صوبہ خیبر پختونخوا کے قبائلی ضلع خیبر کے باڑہ بازار میں نامعلوم افراد کی فائرنگ سے مقامی مشر حاجی نصیب آفریدی ہلاک ہوگئے۔ پولیس کے مطابق، انہیں اس وقت ٹارگٹ کلنگ کا نشانہ بنایا گیا جب وہ اپنی دکان کے اندر موجود تھے۔ حملہ آور فائرنگ کے بعد فرار ہونے میں کامیاب ہوگئے۔

بنوں دھماکہ

دوسری جانب، بنوں کے تھانہ ڈومیل کی حدود میں شدت پسندوں نے ہائی وے پولیس موبائل کو نشانہ بنانے کی کوشش کی۔ پولیس کے مطابق، دہشتگردوں نے آدھمی پل کے قریب سڑک کنارے بارودی مواد نصب کیا تھا، جو پولیس موبائل کے گزرتے ہی زور دار دھماکے سے پھٹ گیا۔ تاہم، خوش قسمتی سے کوئی جانی نقصان نہیں ہوا۔