خیبر پختونخوا: جنوبی وزیرستان میں اغوا کیے گئے دو پولیس اہلکار ہلاک

وانا (ل و) صوبہ خیبر پختونخوا کے قبائلی ضلع جنوبی وزیرستان کی تحصیل توئی خلہ میں اغوا کیے گئے دو پولیس اہلکار ہلاک ہوگئے۔

پولیس کے مطابق ہلاک ہونے والوں میں کانسٹیبل حمید شاہ دوتانی اور کانسٹیبل اشرف دوتانی شامل ہیں۔ دونوں اہلکاروں کو گزشتہ روز تور دیب گاؤں سے اغوا کیا گیا تھا، جس کے بعد آج ان کی لاشیں برآمد ہوئیں۔

اغوا کے دوران پولیس کے ساتھ مقابلے میں تین شدت پسند بھی مارے گئے تھے۔

پولیس کا کہنا ہے کہ شدت پسندوں کے خلاف کارروائی کا دائرہ مزید وسیع کیا جا رہا ہے، اور ملزمان کی تلاش جاری ہے۔

بنوں میں نامعلوم مسلح افراد کی فائرنگ سے پولیس اہلکار ہلاک، نماز جنازہ ادا

دوسری جانب بنوں میں شدت پسندوں کی فائرنگ سے ہلاک ہونے والے پولیس اہلکار کی نماز جنازہ ادا کر دی گئی۔ پولیس اہلکار کرامت اللہ کو تھانہ بکا خیل کی حدود میں فائرنگ کا نشانہ بنایا گیا۔

کرامت اللہ 120 دن کی چھٹی پر تھا۔ ان کی نماز جنازہ بنوں پولیس لائن میں ادا کی گئی۔