خیبر پختونخوا: رواں سال دہشتگردی کے 830 مقدمات درج، 502 دہشت گرد گرفتار، 216 ہلاک

پشاور (ڈیلی اردو) کاؤنٹر ٹیررزم ڈیپارٹمنٹ (سی ٹی ڈی) کی رپورٹ کے مطابق خیبر پختونخوا میں رواں سال دہشت گردی کے 830 مقدمات درج کیے گئے۔

رپورٹ کے مطابق دہشت گردی کے مقدمات میں 1 ہزار 982 افراد کو نامزد کیا گیا جبکہ آپریشنز میں 502 دہشت گردوں کو گرفتار اور 216 کو ہلاک کیا گیا۔

سی ٹی ڈی کی جاری کی گئی رپورٹ کے مطابق رواں سال 32 دہشت گردوں کو عدالتوں سے سزائیں دلوائی گئیں جبکہ بھتہ خوری کے 80 کیسز رجسٹرڈ اور 47 میں پیش رفت ہوئی۔

رپورٹ کے مطابق بھتہ خوری کے کیسز میں 197 ملزمان کو نامزد کیا گیا، مختلف کارروائیوں میں 89 بھتہ خور گرفتار کیے گئے جبکہ 5 ہلاک ہوئے۔

ڈی آئی جی (سی ٹی ڈی) عمران شاہد کے جاری بیان کے مطابق دہشت گری اور بھتہ خوری میں افغان شہری ملوث ہیں، بھتہ خوری اور دہشت گردی میں افغانستان کی سمیں استعمال کی جاتی ہیں، جنہیں ٹریس کرنے میں مشکل پیش آتی ہیں۔