خیبر پختونخوا میں پولیس اہلکاروں کی ٹارگٹ کلنگ کا سلسلہ جاری، متعدد اہلکاروں کی ہلاکتیں

اسلام آباد (ڈیلی اردو رپورٹ) پاکستان کے صوبے خیبر پختونخوا کے مختلف علاقوں میں پولیس اہلکاروں کو شدت پسندوں کی طرف سے ٹارگٹ کلنگ کا سامنا ہے، جس کے نتیجے میں پولیس کے متعدد اہلکار ہلاک ہو گئے ہیں۔ یہ سلسلہ ایک بار پھر شدت اختیار کر گیا ہے، اور حالیہ واقعات میں شدت پسندوں نے مختلف اضلاع میں فائرنگ کر کے پولیس اہلکاروں کو نشانہ بنایا، جس میں کئی اہلکار جان کی بازی ہار چکے ہیں۔

ہنگو: پولیس اہلکار کی ہلاکت

ضلع ہنگو میں پولیس اہلکار کو فائرنگ کر کے ہلاک کر دیا گیا۔ پولیس کے مطابق، ڈسٹرکٹ سیکیورٹی برانچ کا اہلکار شناوڑی کے علاقے میں ہنگو بازار سے تھانہ بلیامینہ ڈیوٹی کے لیے جا رہا تھا۔ اس دوران، نامعلوم موٹر سائیکل سواروں نے اس پر اندھا دھند فائرنگ کر دی، جس کے نتیجے میں وہ موقع پر ہی جان سے ہاتھ دھو بیٹھا۔ پولیس نے جائے وقوعہ سے شواہد اکٹھے کر کے ملزمان کی تلاش شروع کر دی ہے۔ ڈی ایس پی ہنگو کے مطابق، یہ واقعہ شدت پسندوں کی طرف سے پولیس اہلکاروں کو نشانہ بنانے کا حصہ تھا۔

جنوبی وزیرستان: پولیس اہلکار کی ہلاکت

جنوبی وزیرستان میں بھی پولیس اہلکاروں کی ہلاکت کا سلسلہ جاری ہے۔ جنوبی وزیرستان کے علاقے اعظم ورسک میں شدت پسندوں کی فائرنگ سے پولیس اہلکار عمران جان کی بازی ہار گئے۔ ذرائع کے مطابق، عمران ڈیوٹی کے بعد گھر جا رہا تھا کہ شدت پسندوں نے اس پر فائرنگ کر دی۔ عمران کی ہلاکت کے بعد پولیس نے علاقے میں سرچ آپریشن شروع کر دیا ہے اور شدت پسندوں کی گرفتاری کے لیے کوششیں جاری ہیں۔

لکی مروت: پولیس پر شدت پسندوں کا حملہ

اسی دوران، لکی مروت میں بھی شدت پسندوں نے فائرنگ کر کے پولیس اہلکاروں کو نشانہ بنایا۔ تھانہ سٹی کے حدود میں شدت پسندوں نے فائرنگ کر کے پولیس ہیڈ کانسٹیبل احسان اللہ کو ہلاک کر دیا، جبکہ کانسٹیبل رفیع اللہ کو زخمی کر دیا۔ زخمی اہلکار کو تحصیل ہیڈ کوارٹر اسپتال سرائے نورنگ منتقل کیا گیا، تاہم احسان اللہ زخموں کی تاب نہ لاتے ہوئے دم توڑ گیا۔ پولیس نے واقعے کے بعد فوری طور پر سرچ آپریشن شروع کر دیا ہے اور شدت پسندوں کی تلاش جاری ہے۔

ڈیرہ اسماعیل خان: پولیس کی فائرنگ میں ایک شدت پسند کی ہلاکت

ڈیرہ اسماعیل خان کے علاقے کلاچی میں پولیس اور سی ٹی ڈی نے مشکوک افراد کی موجودگی پر چھاپہ مارا، جس کے دوران فائرنگ کا تبادلہ ہوا اور ایک شدت پسند مارا گیا۔ پولیس کے مطابق، شدت پسندوں نے چھاپے کے دوران فائرنگ کی، جس کے جواب میں ایک شدت پسند مارا گیا۔ اس کارروائی کے دوران پولیس کو مزید شواہد بھی حاصل ہوئے ہیں اور دہشت گردوں کے خلاف مزید کارروائیوں کے لیے تیاری کی جا رہی ہے۔

شمالی وزیرستان: سیکیورٹی فورسز کی کارروائی میں شدت پسند ہلاک

شمالی وزیرستان میں سکیورٹی فورسز کی کارروائی میں ایک شدت پسند ہلاک اور دوسرا زخمی ہوگیا۔ خدی قلعے کے قریب کی گئی اس کارروائی میں سکیورٹی فورسز نے شدت پسندوں کو نشانہ بنایا۔ ہلاک ہونے والے شدت پسند کی شناخت “معاذ” کے نام سے ہوئی ہے، جب کہ اس کے ساتھی کو زخمی حالت میں گرفتار کر لیا گیا ہے۔ سکیورٹی فورسز نے علاقے کو سیل کر کے مزید تحقیقات شروع کر دی ہیں۔

ضلع ٹانک: امن کمیٹی کا رکن ہلاک

ضلع ٹانک کے علاقے گل امام میں شدت پسندوں نے امن کمیٹی کے رکن ہدایت اللہ کو ان کے گھر میں داخل ہو کر ہلاک کر دیا۔ کالعدم تحریک طالبان پاکستان (ٹی ٹی پی) نے اس قتل کی ذمہ داری قبول کی ہے۔ ہدایت اللہ کی ہکاکت اس بات کا غماز ہے کہ دہشت گردوں کا نشانہ صرف پولیس نہیں بلکہ وہ امن کمیٹی کے ارکان کو بھی اپنی کارروائیوں کا حصہ بنا رہے ہیں۔

خیبر: شدت پسندوں کا حملہ

خیبر کے علاقے تیراہ میں شدت پسندوں نے چیک پوسٹ پر حملہ کیا، جس کے نتیجے میں سیکیورٹی فورسز کا ایک اہلکار قیصر زخمی ہو گیا۔

جنوبی وزیرستان: قرآن کی تلاوت کرتے ہوئے ہلاکت

جنوبی وزیرستان کے علاقے وانا اعظم ورسک کے ساتھ وڑائی نور میں ایک شخص کو قرآن پاک کی تلاوت کرتے ہوئے نامعلوم مسلح افراد نے فائرنگ کر کے ہلاک کر دیا۔ پولیس کے مطابق، قتل کی وجہ ابھی تک معلوم نہیں ہو سکی، لیکن مقتول کا تعلق شمالی وزیرستان سے بتایا جا رہا ہے۔ اس واقعے نے علاقے میں خوف و ہراس پیدا کر دیا ہے۔

جنوبی وزیرستان میں کرفیو نافذ

ادھر سیکورٹی خدشات کی وجہ سے جنوبی وزیرستان اپر میں بدھ کو کرفیو نافذ کردیا گیا۔

ڈپٹی کمشنر جنوبی وزیرستان اپر کے مطابق ایک دن کیلئے کرفیو کے دوران نقل و حرکت پر مکمل پابندی عائد ہوگی جبکہ کل صبح 6 سے لیکر شام 6 بجے تک دو راستے ٹریفک کیلئے بند رہیں گے۔

انہوں نے کہا کہ آسمان منزہ سے لدھا اور مکین تک جبکہ نواز کوٹ سے رزمک تک سڑک ٹریفک کیلئے بند ہے۔

ڈپٹی کمشنر کا مزید کہنا تھا کہ مسافروں سے درخواست ہے کہ وہ متبادل راستہ اختیار کریں ۔

پشاور میں دہشت گردوں کی مالی معاونت، ملزم کو 13 سال قید کی سزا

پشاور کی انسداد دہشت گردی کی عدالت نے دہشت گردوں کی مالی معاونت کرنے والے ملزم کو 13 سال قید کی سزا سنا دی۔

عدالت نے ملزم خان محمد کو ڈھائی لاکھ روپے جرمانے کی سزا بھی سنائی۔

اے ٹی سی نے اپنے حکم میں کہا ہے کہ جرمانہ ادا نہ کرنے پر ملزم کو مزید 15 ماہ قید بھگتنا ہو گی۔

پولیس پر دہشت گردوں کے حملوں میں اضافہ

خیبر پختونخوا پولیس ایک بار پھر دہشت گردوں کے نشانے پر آ گئی ہے۔ رواں سال کے دوران پولیس پر 68 حملے ہوئے، جن میں 26 سے زائد پولیس اہلکار جان کی بازی ہار چکے ہیں اور 30 زخمی ہو چکے ہیں۔ پولیس کا کہنا ہے کہ دہشت گردوں کے خلاف بھرپور کارروائیاں کی جا رہی ہیں، اور ان حملوں کا جواب دیا جائے گا۔ پولیس ترجمان نے کہا کہ دہشت گردوں کو ہر صورت میں شکست دی جائے گی اور عوام کو مکمل تحفظ فراہم کیا جائے گا۔