خیبر: کرکٹ میچ کے دوران طالبان کمانڈر کی آمد، مخبری کرنے والوں کو "ذبح" کرنے کا اعلان

باڑہ (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع خیبر کی تحصیل باڑہ میں ایک کرکٹ میچ کے دوران کالعدم تنظیم تحریک طالبان پاکستان (ٹی ٹی پی) کے ایک کمانڈر نے اچانک گراؤنڈ میں انٹری دے کر عوام کو "مخبری نہ کرنے" کی سخت وارننگ جاری کردی۔

ڈیلی اردو کے مطابق یہ واقعہ تحصیل باڑہ کے علاقے اکاخیل میں پیش آیا، جہاں مقامی سطح پر جاری ایک کرکٹ میچ کے دوران اچانک کالعدم ٹی ٹی پی کے ایک کمانڈر نے گراؤنڈ میں داخل ہو کر کھلاڑیوں اور تماشائیوں کو مخاطب کیا۔

کمانڈر نےاسٹیج پر اپنے خطاب میں واضح طور پر دھمکی دیتے ہوئے کہا کہ “جس نے بھی ہماری مخبری کی تو اس کا انجام برا ہوگا، ہم اسے گولی مار دیں گے، ذبح بھی کر سکتے ہیں اور دیگر سزائیں بھی دے سکتے ہیں۔”

کمانڈر نے دعویٰ کیا کہ اُن کا عام لوگوں، مقامی رہنماؤں یا سیاسی جماعتوں سے کوئی ذاتی یا تنظیمی تنازعہ نہیں ہے، تاہم جو بھی شخص اُن کی مخبری کرے گا، وہ سخت انجام سے نہیں بچ سکے گا۔"

کمانڈر نے کھلاڑیوں اور تماشائیوں کو یقین دلایا کہ کرکٹ میچز جاری رہیں گے۔ اُنہوں نے کہا کہ “ہم کسی سیاسی یا قومی رہنما سے وابستہ نہیں، نہ ہی ہمارا کسی سیاسی جماعت یا قومی مشران سے ذاتی مفاد ہے۔ ہم ان سے خوش اسلوبی سے مصافحہ کرتے ہیں، مگر کسی تنظیمی کام میں شریک نہیں۔”

خطاب کے دوران کمانڈر نے مقامی نوجوانوں سے اپیل کی کہ وہ اپنے روزمرہ کاموں پر توجہ دیں، طالبان یا حکومت کے لیے جاسوسی نہ کریں، اور کسی ایک شخص کی غلطی کے باعث پورے علاقے کو مشکلات میں نہ ڈالیں۔ اُنہوں نے کہا کہ ماضی میں بعض شکایات سامنے آئی ہیں کہ مقامی افراد نے دشمن (پاکستان آرمی) کے لیے معلومات فراہم کیں جس کے نتیجے میں کارروائیاں ہوئیں۔

کمانڈر نے نوجوان نسل کو نظم و ضبط برقرار رکھنے کی ہدایت دیتے ہوئے کہا کہ “اخلاقی اور عملی ڈسپلن برقرار رکھنا سب کی ذمہ داری ہے۔”

اُنہوں نے واضح کیا کہ بچوں کے ساتھ جنسی تشدد برداشت نہیں کیا جائے گا اور ایسے واقعات میں ملوث افراد کو سخت سزا دی جائے گی۔

کمانڈر نے یہ بھی کہا کہ “ہم عوام کو یقین دلاتے ہیں کہ اگر وہ ہمارے خلاف جاسوسی نہیں کریں گے تو ہم بھی اُن کے خلاف کوئی کارروائی نہیں کریں گے۔ ہم عوام کے دشمن نہیں، مگر جاسوسی کرنے والوں کو نہیں چھوڑیں گے۔”

خطاب کے آخر میں کمانڈر نے عوام سے کہا کہ وہ طالبان کی حمایت کریں، اُن کا ساتھ دیں، اور یہ پیغام دوسروں تک بھی پہنچائیں۔

تحصیل باڑہ چونکہ خیبر پختونخوا کے وزیراعلیٰ سہیل آفریدی کا آبائی علاقہ ہے، اس لیے اس واقعے نے مقامی سطح پر تشویش میں اضافہ کردیا ہے۔ مقامی ذرائع کے مطابق کمانڈر کی آمد کے بعد گراونڈ میں موجود تماشائیوں میں بھگدڑ مچ گئی، کئی لوگ واپس گھروں کو چلے گئے اور میچ مؤخر یا منسوخ ہونے کے خدشات ظاہر کیے گئے۔

تاحال اس واقعے میں کسی جانی یا مالی نقصان کی اطلاع موصول نہیں ہوئی۔ سرکاری سطح پر بھی کسی ادارے یا ضلعی انتظامیہ کی جانب سے کوئی باضابطہ بیان سامنے نہیں آیا۔

مقامی عوام، قبائلی مشران اور سیاسی نمائندوں نے مطالبہ کیا ہے کہ سیکیورٹی ادارے فوری طور پر اس واقعے کی تحقیقات کریں، ذمہ داروں کی نشاندہی کر کے عوام کے جان و مال کے تحفظ کو یقینی بنائیں، اور مستقبل میں عوامی تقریبات کے دوران سیکیورٹی کو مزید سخت کیا جائے۔

سماجی و مذہبی رہنماؤں سے بھی اپیل کی جا رہی ہے کہ وہ عوام کو تحمل کا مظاہرہ کرنے، افواہوں سے گریز کرنے اور علاقے کے امن کو برقرار رکھنے کے لیے اپنا کردار ادا کریں۔