راولپنڈی: توہین رسالت کے مقدمات میں 5 افراد کو سزائے موت اور قید

راولپنڈی (ڈیلی اردو) صوبہ پنجاب کے ضلع راولپنڈی کی مقامی عدالت نے 5 افراد کو توہین رسالت اور پیکا قوانین کے تحت موت اور عمر قید کی سزائیں سنا دیں۔

تفصیلات کے مطابق راولپنڈی کے ایڈیشنل سیشن جج محمد طارق ایوب نے 5 ملزمان کو توہین رسالت کے مقدمہ میں سزائے موت، عمر قید اور مجموعی طور پر 100 سال قید کی سزا سنا دی۔

ملزمان محمد ارسلان، علی عباس، فیصل ریحان، زنیر سکندر اور خرم افضال کو سزائیں سنائی گئیں۔

ملزمان کو دفعہ 295 سی میں سزائے موت، 295 بی میں عمر قید، 295 اے میں 10 سال قید، ایک لاکھ روپے جرمانہ کی سزائیں سنائی گئیں۔

ملزمان کو دفعہ 298 اے میں 3 سال قید ایک لاکھ روپے جرمانہ اور پیکا آرڈیننس میں 7 سال قید اور ایک لاکھ روپے جرمانہ کی سزا سنائی گئی۔

عدالت نے توہین رسالت کے الزام میں پانچ مجرمان کو سزائے موت اور قید کی سزائیں سناتے ہوئے کہا کہ مجرمان نے گھناؤنا جرم کیا ہے اور یہ کسی بھی رعایت کے مستحق نہیں ہیں۔ عدالت نے حکم دیا کہ ان مجرمان کو اس وقت تک پھانسی کے پھندے پر لٹکایا جائے جب تک ان کی موت نہ واقع ہو۔

فیصلے کی سماعت کے دوران انتہائی سخت سیکیورٹی کے انتظامات کیے گئے تھے، اور بڑی تعداد میں وکلا اور شہری بھی موجود تھے۔ فیصلے کے بعد پانچوں مجرمان کو عدالت سے سخت سیکیورٹی حصار میں اڈیالہ جیل منتقل کر دیا گیا۔