سعودی عرب کا مدینہ منورہ کی جانب آنے والا بیلسٹک میزائل تباہ کرنے کا دعویٰ

ریاض (ڈیلی اردو) سعودی عرب کی قیادت میں قائم فوجی اتحاد نے دعویٰ کیا ہے کہ اس کے فضائی دفاعی نظام نے مدینہ منورہ کی سمت داغے گئے ایک بیلسٹک میزائل کو فضا میں ہی روک کر تباہ کردیا ہے، تاہم یمن کے حوثی گروہ انصار اللہ نے مقدس شہر کو نشانہ بنانے کی کوشش کے الزام کو مسترد کردیا ہے۔

سعودی فوجی اتحاد کے ترجمان بریگیڈیئر جنرل ترکی المالکی نے سماجی رابطے کی ویب سائٹ ایکس پر جاری بیان میں کہا کہ فضائی دفاعی نظام نے مدینہ کے علاقے کی جانب آنے والے بیلسٹک میزائل کو کامیابی سے روک کر تباہ کردیا۔ ان کے مطابق میزائل کو ہدف تک پہنچنے سے پہلے ہی ناکارہ بنا دیا گیا۔

یہ واقعہ ایسے وقت میں پیش آیا جب سعودی حکام نے ملک کے مغربی شہر ینبع اور جنوبی علاقے شرورہ میں ممکنہ خطرات کے پیش نظر انتباہ جاری کیے تھے۔ تاہم بعد ازاں حکام نے بتایا کہ فوری خطرہ ٹل گیا ہے۔

دوسری جانب حوثی گروہ انصار اللہ کے فوجی ترجمان یحییٰ سریع نے مدینہ منورہ کو نشانہ بنانے سے متعلق سعودی دعوے کی تردید کرتے ہوئے اسے بے بنیاد اور گمراہ کن قرار دیا ہے۔

حوثیوں کے زیر انتظام میڈیا کے مطابق یحییٰ سریع کا کہنا ہے کہ ان کی فوجی کارروائیوں کا ہدف سعودی عرب کی تیل کی تنصیبات اور فوجی اڈے ہیں، جبکہ اسلامی مقدس مقامات کو نشانہ بنانا ان کی کارروائیوں کا حصہ نہیں ہے۔

حوثی ترجمان نے سعودی عرب پر الزام عائد کیا کہ وہ ایسے بیانات کے ذریعے عالمی رائے عامہ کو متاثر کرنے اور یمن کے خلاف اپنی فوجی کارروائیوں کے لیے بین الاقوامی حمایت حاصل کرنے کی کوشش کر رہا ہے۔

واضح رہے کہ سعودی عرب اور یمن کے حوثی گروہ کے درمیان برسوں سے کشیدگی اور فوجی محاذ آرائی جاری رہی ہے۔ ماضی میں حوثیوں کی جانب سے سعودی سرزمین پر میزائل اور ڈرون حملوں کے متعدد دعوے سامنے آتے رہے ہیں، جبکہ سعودی فضائی دفاعی نظام بھی ایسے حملوں کو ناکام بنانے کی اطلاعات دیتا رہا ہے۔