سندھ: کراچی میں فائرنگ، پولیس اہلکار ہلاک، اسلحہ چھین کر ملزمان فرار

کراچی (نمائندہ ڈیلی اردو) صوبہ سندھ کے صوبائی حکومت کراچی کے اولڈ سٹی ایریا رنچھور لائن میں واقع جوبلی مارکیٹ کے قریب موٹر سائیکل سوار نامعلوم مسلح افراد کی فائرنگ سے ایک پولیس اہلکار ہلاک ہو گیا۔ ہلاک ہونے والا اہلکار چاکیواڑا تھانے میں تعینات تھا اور صفورا چوک کے قریب رہائش پذیر تھا۔

پولیس کے مطابق واقعہ اُس وقت پیش آیا جب اہلکار جوبلی مارکیٹ کے قریب واقع غوثیہ بریانی سینٹر سے بریانی کا پارسل لینے آیا تھا۔ موٹر سائیکل پر سوار دو ملزمان نے اہلکار سے نائن ایم ایم پستول چھیننے کی کوشش کی۔ مزاحمت پر مسلح افراد نے فائرنگ کر دی، جس کے نتیجے میں اہلکار کندھے اور پیٹ پر گولیاں لگنے سے شدید زخمی ہو گیا اور بعد ازاں دم توڑ گیا۔ ملزمان اہلکار کا اسلحہ لے کر فرار ہو گئے۔

ایس ایس پی سٹی عارف عزیز کے مطابق فائرنگ کا واقعہ ممکنہ طور پر ٹارگٹ کلنگ یا ذاتی دشمنی کا نتیجہ ہو سکتا ہے، تاہم تفتیش جاری ہے۔ پولیس نے جائے وقوعہ سے تیس بور پستول کے دو خول سمیت دیگر شواہد اکٹھا کر لیے ہیں، جب کہ واقعے کی سی سی ٹی وی فوٹیج بھی حاصل کر لی گئی ہے۔

فوٹیج میں دیکھا جا سکتا ہے کہ ایک موٹر سائیکل پر سوار دو ملزمان میں سے ایک نے عبایا اور جوگر پہن رکھے تھے جبکہ دوسرے نے چہرے پر ماسک اور گلے میں رومال ڈال رکھا تھا۔ دونوں ملزمان پولیس اہلکار کے پاس رکے، اسلحہ چھیننے کی کوشش کی اور مزاحمت پر فائرنگ کرکے موقع سے فرار ہو گئے۔

ادھر ایڈیشنل آئی جی کراچی جاوید عالم اوڈھو نے واقعے کا نوٹس لیتے ہوئے ایس ایس پی سٹی سے فوری رپورٹ طلب کر لی ہے اور ہدایت دی ہے کہ ملزمان کی گرفتاری اور واقعے کی شفاف تفتیش کے لیے مؤثر اقدامات کیے جائیں۔

وزیر داخلہ سندھ ضیاء الحسن لنجار نے بھی واقعے کا نوٹس لیتے ہوئے واقعے پر اب تک کی پولیس کارروائی کی تفصیلات طلب کر لی ہیں اور واقعے کی مکمل تحقیقات کے لیے خصوصی ٹیم تشکیل دینے کی ہدایت جاری کی ہے۔ انہوں نے کہا کہ ایس ایس پی سٹی خود تفتیشی امور کی نگرانی کریں گے اور رپورٹ سے باقاعدگی سے آگاہ رکھا جائے گا۔

پولیس حکام کے مطابق علاقے کے اطراف لگے سی سی ٹی وی کیمروں کی مدد سے ملزمان کا سراغ لگانے کی کوششیں جاری ہیں۔