سوات: چپریال میں نامعلوم افراد کی فائرنگ مولانا رشید احمد ہلاک

سوات(ڈیلی اردو) خیبرپختونخواہ کے شورش زدہ ضلع سوات کی تحصیل مٹہ کے علاقے چپریال میں نامعلوم افراد نے فائرنگ کرکے مولانا رشید احمد کو ہلاک کردیا۔

پولیس کے مطابق چپریال کے رہائشی مولانا رشید احمد ولد امیر محمد بازار کے قریب مسجد میں نماز کی ادائیگی کے لیے جارہے تھے کہ نامعلوم افراد نے انہیں فائرنگ کا نشانہ بنا دیا۔ گولیاں لگنے سے وہ شدید زخمی ہوگئے اور بعد ازاں زخموں کی تاب نہ لاتے ہوئے ہلاک ہوگئے۔

پولیس نے واقعے کے بعد لاش کو پوسٹ مارٹم کے لیے اسپتال منتقل کردیا۔ مقتول کے والد کی مدعیت میں نامعلوم ملزمان کے خلاف مقدمہ درج کرکے واقعے کی وجوہات اور فائرنگ میں ملوث افراد کی شناخت کے لیے تفتیش شروع کردی گئی ہے۔

پولیس ذرائع کے مطابق مولانا رشید احمد تقریباً تین سال قبل تبلیغی سرگرمیوں کے سلسلے میں بیرون ملک گئے تھے اور چند ماہ قبل ہی واپس اپنے آبائی علاقے چپریال آئے تھے۔