سپریم کورٹ آف پاکستان نے ڈاکٹر شاہنواز کنبھر قتل کیس کے ملزم کی ضمانت کی درخواست مسترد کر دی

اسلام آباد (ڈیلی اردو/بی بی سی) سپریم کورٹ آف پاکستان نے عمرکوٹ میں ڈاکٹر شاہنواز کنبھر کے قتل اور لاش نذرِ آتش کرنے کے مقدمے میں نامزد ملزم مولوی احمد شاہانی کی ضمانت بعد از گرفتاری کی درخواست مسترد کر دی ہے۔

پیر کے روز جسٹس جمال خان مندوخیل اور جسٹس مسرت ہلالی پر مشتمل دو رکنی بینچ نے کیس کی سماعت کی، جبکہ مقتول ڈاکٹر شاہنواز کے وکیل ویڈیو لنک کے ذریعے کراچی رجسٹری میں سماعت کا حصہ بنے۔

سماعت کے دوران سرکاری وکیل نے مؤقف اختیار کیا کہ ملزم نے واقعے کے بعد خطاب کے ذریعے لوگوں کو مشتعل کیا۔ لاش کو عمرکوٹ سے گاؤں لایا گیا اور مقتول کے والد سے زبردستی چھینی گئی۔ اس مقدمے میں چار گواہوں کے بیانات ریکارڈ ہو چکے ہیں۔

دوسری جانب ملزم کے وکیل نے عدالت کو بتایا کہ لاش کی تدفین کے وقت جھگڑا ضرور ہوا، تاہم ملزم موقع پر موجود نہیں تھا۔ وکیل کے مطابق مقدمے میں لگائی گئی دفعات کے تحت زیادہ سے زیادہ ایک سال کی سزا بنتی ہے، جبکہ ملزم دس ماہ سے زیرِ حراست ہے۔

سماعت کے دوران جسٹس مسرت ہلالی نے ریمارکس دیے کہ سپریم کورٹ اب اس معاملے میں مزید کچھ نہیں کر سکتی۔ انھوں نے کہا کہ درخواست گزار کو اپنی درخواست واپس لینا ہوگی ورنہ اسے خارج کر دیا جائے گا۔ اس کے بعد ملزم کے وکیل نے درخواست واپس لے لی۔

عدالت نے درخواست نمٹاتے ہوئے ٹرائل کورٹ کو ہدایت کی کہ مقدمے کا فیصلہ تین ماہ کے اندر مکمل کیا جائے۔