سکھر: مقتول ہندو صحافی اجے لالوانی کی آخری رسومات ادا، تحقیقات کیلئے 4 رکنی کمیٹی تشکیل

سکھر (ڈیلی اردو) نجی ٹی وی چینل رائل نیوز اور مقامی اخبار سے منسلک ہندو صحافی اجے لالوانی کو بدھ کی رات مسلح شخص نے فائرنگ کرکے زخمی کیا تھا جو سول ہسپتال سکھر میں زیرعلاج تھے اور جمعرات کو زخموں کی تاب نہ لاتے ہوئے دم توڑ گئے تھے۔

صحافی اجے لالوانی کی آخری رسومات سندھ کے ضلع سکھر کے نواحی علاقے صالح پٹ میں ادا کردی گئیں۔

دوسری جانب اجے لالوانی کے قتل کے بعد پولیس نے ہیئر ڈریسر شاپ کے مالک کو حراست میں لے لیا اوراس سےتفتیش جاری ہے۔

پولیس کے مطابق صحافی اجے لالوانی کو ہیئرڈریسر شاپ پرنقاب پوش نے فائرنگ کا نشانہ بنایا تھا۔

مقتول کے کزن پردیپ نے بتایا کہ سول اسپتال عملے کی کوتاہی کے باعث اجے لالوانی کی موت واقع ہوئی، سول اسپتال عملے نے پہلے بتایا الٹرا ساؤنڈ میں گولی نظر نہیں آرہی اورصرف طبی امداددی لیکن اگلے روز درد بڑھنے پرٹیسٹ کرائے تو گولی جسم میں ہی تھی۔

سینیئر سپرٹنڈنٹ آف پولیس (ایس ایس پی) عرفان سموں کا کہنا ہے کہ پولیس افسران سمیت جائے وقوعہ کا خود بھی معائنہ کیا جہاں سے گولیوں کے خول سمیت تقریباً تمام شواہد اکٹھے کیے۔

اُدھر قتل کی تحقیقات کیلئے ڈپٹی سپرٹنڈنٹ آف پولیس (ڈی ایس پی) کی سربراہی میں 4 رکنی کمیٹی تشکیل دے دی گئی ہے۔

صحافیوں کے لیے محفوظ ممالک کی رینکنگ میں پاکستان کا 180 میں سے 145 واں نمبر ہے۔