سی ٹی ڈی کی راولپنڈی میں کارروائی، اسلام آباد تھانے پر حملے میں ملوث 2 دہشت گرد گرفتار

لاہور (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی)ے راولپنڈی کے مغل مارکیٹ کے قریب بڑی کارروائی کرتے ہوئے فتنہ الخوارج کے 2 خطرناک دہشت گردوں کو گرفتار کر لیا۔

ترجمان سی ٹی ڈی کے مطابق، انٹیلی جنس بیسڈ کارروائی کے ذریعے تھانہ آئی نائن پر حملے میں ملوث دہشت گرد حمزہ اور رومان کو گرفتار کیا گیا۔

ترجمان نے مزید بتایا کہ یہ دہشت گرد راولپنڈی اور اسلام آباد میں حساس مقامات پر دہشت گردی کی کارروائی کے لیے ریکی مکمل کر چکے تھے اور افغانستان میں فتنہ الخوارج کے اہم کمانڈر کے ساتھ رابطے میں تھے۔

سی ٹی ڈی کے مطابق، دہشت گردوں سے دستی بم، بارودی مواد، ڈیٹونیٹر، سیفٹی فیوز وائر اور دیگر سامان برآمد ہوا ہے۔ دہشت گردوں کے خلاف مقدمہ درج کر کے مزید تفتیش شروع کر دی گئی ہے۔

ابتدائی تفتیش سے یہ بھی پتا چلا ہے کہ ان دہشت گردوں نے کچھ ماہ قبل اسلام کے تھانہ آئی نائن پرراکٹ حملہ کیا تھا۔

سی ٹی ڈی نے دہشت گردوں کے نیٹ ورک کو مزید بے نقاب کرنے کے لیے کارروائیاں جاری رکھنے کا اعلان کیا ہے۔

‏‏پاکستان، کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کیلئے خوارج کی اصطلاح استعمال کرتا ہے۔