شام اور اسرائیل کا دشمن مشترکہ ہے، اسرائیل کے ساتھ مل کر خطے میں‌امن قائم کرسکتے ہیں ، شامی صدر احمد الشرع

دمشق + تل ابیب(ڈیلی اردو) شام کے عبوری صدر احمد الشرع نے ہفتے کے روز انکشاف کیا کہ اسرائیل کے ساتھ علاقائی سلامتی کو یقینی بنانے کے لیے کردار ادا کیا جا سکتا ہے، خاص طور پر اس تناظر میں کہ شام اور اسرائیل کے مشترکہ دشمن موجود ہیں۔

الشرع نے “المجلہ اليهودية” (یہودی جریدہ) کو دیے گئے انٹرویو میں کہا کہ “شام اور اسرائیل کے درمیان باہمی گولہ باری کا دور ختم ہونا چاہیے”۔ انہوں نے مزید کہا، “شام اور اسرائیل کے مشترکہ دشمن ہیں، اور ہم علاقائی سلامتی میں اہم کردار ادا کر سکتے ہیں۔”

انہوں نے 1974 میں دستخط شدہ “فکِ اشتباک” (Disengagement Agreement) کی طرف واپسی کی خواہش کا اظہار کیا، لیکن صرف جنگ بندی کے لیے نہیں بلکہ شام اور اسرائیل کے درمیان باہمی ضبطِ نفس اور شہریوں، بالخصوص جنوبی شام کے جولان کے پہاڑی علاقے میں مقیم دروز برادری، کے تحفظ کی ضمانت کے طور پر۔

الشرع نے اسرائیل کے ساتھ فوری طور پر تعلقات معمول پر لانے (Normalization) کی بات سے انکار کیا، لیکن بین الاقوامی قانون کے اصولوں اور شام کی خودمختاری کے احترام پر مبنی مستقبل کی بات چیت کے لیے آمادگی ظاہر کی۔ انہوں نے مزید کہا: “امن باہمی احترام سے حاصل کیا جانا چاہیے، نہ کہ خوف سے۔”

گفتگو کے دوران الشرع نے امریکی صدر ڈونلڈ ٹرمپ سے براہِ راست مکالمے کی خواہش کا اظہار بھی کیا، ان کا کہنا تھا: “شام کو ایک غیر جانب دار ثالث کی ضرورت ہے”، تاکہ خطے میں استحکام قائم ہو سکے۔

واضح رہے کہ “المجلہ اليهودية” ایک امریکی، آزاد، غیر منافع بخش ہفتہ وار جریدہ ہے، جو لاس اینجلس کے بڑے یہودی کمیونٹی کے امور پر توجہ دیتا ہے اور امریکہ کے نمایاں یہودی ذرائع ابلاغ میں شمار ہوتا ہے۔