شمالی وزیرستان اور ٹانک میں سکیورٹی فورسز کے آپریشنز، 3 پاکستانی طالبان ہلاک

راولپنڈی (ک م) پاکستان کے شورش زدہ صوبے خیبر پختونخوا کے اضلاع شمالی وزیرستان اور ٹانک میں سیکیورٹی فورسز نے دو الگ الگ آپریشنز میں کالعدم تحریک طالبان پاکستان سے تعلق رکھنے والے تین دہشت گردوں کو ہلاک کر دیا۔

انٹر سروسز پبلک ریلیشنز (آئی ایس پی آر) کے مطابق 2 نومبر کو خیبرپختونخوا میں دو الگ الگ کارروائیوں کے دوران کالعدم تحریک طالبان پاکستان کے تین ارکان ہلاک کیے گئے۔

آئی ایس پی آر نے بتایا کہ شمالی وزیرستان کے علاقے عیشام کے بالمقابل پاکستان-افغانستان سرحد کے راستے دراندازی کی کوشش کرنے والے کالعدم تحریک طالبان پاکستان کے ایک گروہ کی نقل و حرکت سیکیورٹی فورسز نے بروقت نوٹ کی۔

مزید بتایا گیا کہ سیکیورٹی فورسز نے اس گروہ کو مؤثر طور پر نشانہ بنایا، ٹھوس اور مہارت سے کی گئی کارروائی کے نتیجے میں کالعدم تحریک طالبان پاکستان کے 2 ارکان ہلاک کر دیے گئے۔

آئی ایس پی آر کے مطابق ہلاک ہونے والوں میں سے ایک کی شناخت افغان شہری قاسم کے طور پر ہوئی، جو افغان بارڈر پولیس میں خدمات انجام دے رہا تھا۔

پاک فوج کے ترجمان ادارے کے مطابق اسی روز ضلع ٹانک میں کی گئی ایک اور خفیہ معلومات پر مبنی کارروائی میں سیکیورٹی فورسز نے کالعدم تحریک طالبان پاکستان کے ایک اور دہشت گرد کو ہلاک کر دیا۔

ہلاک دہشت گرد کی شناخت خارجی اکرام الدین عرف ابو دجانہ کے نام سے ہوئی، جو بھی افغان شہری تھا۔

آئی ایس پی آر کے مطابق یہ واقعات اس امر کو ظاہر کرتے ہیں کہ بعض افغان شہری پاکستان کے اندر معصوم شہریوں اور سیکیورٹی فورسز کے خلاف دہشت گرد کارروائیوں میں ملوث ہو رہے ہیں۔

پاک فوج کے شعبہ تعلقات عامہ کے مطابق پاکستان متعدد بار عبوری افغان حکومت سے مطالبہ کر چکا ہے کہ وہ اپنی سرحدی نگرانی کو مؤثر بنائے اور یہ یقینی بنائے کہ افغان سرزمین دہشت گردی یا خفیہ نقل و حرکت کے لیے استعمال نہ ہو، اور افغان شہریوں کی پاکستان میں دہشت گرد سرگرمیوں میں شمولیت کو روکا جائے۔

آئی ایس پی آر کے مطابق پاکستان کی سیکیورٹی فورسز ملک کی سرحدوں کے دفاع کے عزم پر پختہ اور غیر متزلزل ہیں؛ شمالی وزیرستان اور ٹانک میں جہاں کالعدم تحریک طالبان پاکستان کے ارکان کو ہلاک کیا گیا، وہاں کلیئرنس آپریشن جاری ہے۔

پاک فوج کے ترجمان ادارے کے مطابق وفاقی اپیکس کمیٹی برائے نیشنل ایکشن پلان کی منظوری سے جاری ’عزمِ استحکام‘ کے وژن کے تحت پاکستان کی سیکیورٹی فورسز اور قانون نافذ کرنے والے ادارے دہشت گردی کے خلاف بے رحمانہ مہم بھرپور انداز میں جاری رکھیں گے تاکہ ملک سے غیر ملکی پشت پناہی یافتہ دہشت گردی کے خاتمے کو یقینی بنایا جا سکے۔