شمالی وزیرستان میں سیکورٹی فورسز کا آپریشن، 3 دہشت گرد ہلاک، ٹی ٹی پی کمانڈر سمیت 4 گرفتار

راولپنڈی (کاشف محمود) صوبہ خیبر پختونخوا کے قبائلی ضلع شمالی وزیرستان کی تحصیل دتہ خیل میں سیکیورٹی فورسز کے آپریشن میں کالعدم تنظیم تحریک طالبان پاکستان (ٹی ٹی پی) 3 دہشت گرد ہلاک کردیے گئے۔ جبکہ انتہائی مطلوب زخمی کمانڈر سمیت 4 تخریب کاروں کو گرفتار کرلیا گیا۔

https://twitter.com/ShabbirTuri/status/1550785324573392896?t=Lbkv_GZ1FauDrayop9Q8Eg&s=19

پاکستانی فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے شمالی وزیرستان کے دو مختلف علاقوں میں انٹیلی بیس کی بنیاد پر آپریشن کئے۔

آئی ایس پی آر کا کہنا ہے کہ ایک کارروائی کے دوران انتہائی مطلوب دہشت گرد کمانڈر زخمی حالت میں گرفتار ہوگیا جبکہ اس کے 3 دیگر ساتھی بھی پکڑے گئے۔

ترجمان پاک فوج کے مطابق سیکیورٹی فورسز کے دوسرے آپریشن میں 3 دہشت گرد مارے گئے، جن سے اسلحہ، گولہ بارود اور دھماکا خیز مواد بھی برآمد ہوا ہے۔

آئی ایس پی آر کا کہنا ہے کہ ہلاک اور گرفتار دہشت گردوں کا تعلق حافظ گل بہادر گروپ سے ہے، یہ دہشت گرد فورسز پر حملوں، اغواء برائے تاوان اور شہریوں کے قتل میں ملوث تھے۔