شمالی وزیرستان میں سیکیورٹی فورسز کی کارروائی، دو دہشت گرد ہلاک

میرانشاہ (ڈیلی اردو) شورش زدہ صوبے خیبر پختونخوا کے قبائلی ضلع شمالی وزیرستان میں پاکستان، افغانستان سرحد کے قریب سیکیورٹی فورسز نے خفیہ اطلاع پر کارروائی کرتے ہوئے دو دہشت گردوں کو ہلاک کر دیا ہے۔

سیکیورٹی ذرائع کے مطابق کارروائی خفیہ معلومات کی بنیاد پر عمل میں لائی گئی، جس کے دوران فائرنگ کے تبادلے میں دو عسکریت پسند ہلاک ہوئے۔ بتایا گیا ہے کہ ہلاک دہشت گردوں میں سے ایک کا تعلق افغان طالبان سے تھا۔

ذرائع نے مزید بتایا کہ کارروائی میں چار سے پانچ عسکریت پسندوں کے زخمی ہونے کی بھی اطلاعات ہیں، جب کہ سیکیورٹی فورسز نے علاقے میں سرچ اور سینیٹائزیشن آپریشن شروع کر رکھا ہے۔

واضح رہے کہ خیبرپختونخوا اور بلوچستان میں دہشت گردی کی کارروائیوں میں اضافہ اس وقت سے دیکھا گیا ہے جب نومبر 2022 میں کالعدم تحریک طالبان پاکستان (ٹی ٹی پی) نے حکومت کے ساتھ ہونے والا جنگ بندی معاہدہ ختم کر دیا تھا۔