شمالی وزیرستان میں پاکستانی کواڈ کاپٹر سے حملہ، 4 بچے ہلاک، 3 زخمی

واشنگٹن (ش ح ط) خیبر پختونخوا کے قبائلی ضلع شمالی وزیرستان کے علاقے میر علی کے نواحی گاؤں ہرمز میں ایک گھر پر پاکستانی سیکیورٹی فورسز کے مبینہ کواڈ کاپٹر حملے میں 4 بچے ہلاک اور 3 افراد زخمی ہو گئے۔

مقامی ذرائع کے مطابق یہ افسوسناک واقعہ 19 مئی 2025 کو صبح سویرے پیش آیا، جب ایک کواڈ کاپٹر نے رہائشی گھر کو نشانہ بنایا۔ دھماکے کے نتیجے میں گھر کا ایک حصہ منہدم ہو گیا، جبکہ بچے موقع پر ہی ہلاک ہو گئے۔ دیگر زخمیوں کو قریبی اسپتال منتقل کیا گیا، جہاں ان کی حالت تشویشناک بتائی جا رہی ہے۔

یاد رہے کہ ایک روز قبل، 11 مئی کو ضلع بنوں کی تحصیل جانی خیل میں بھی پاکستانی فوج کی جانب سے مبینہ ڈرون حملہ کیا گیا تھا، جس میں ایک ہی خاندان کی 10 خواتین اور 4 بچے زخمی ہوئے تھے۔

حالیہ واقعات نے قبائلی اضلاع کے مکینوں میں شدید خوف و ہراس پھیلا دیا ہے۔ مقامی عمائدین اور انسانی حقوق کے کارکنوں نے مطالبہ کیا ہے کہ ان حملوں کی فوری اور غیر جانبدار تحقیقات کی جائیں اور عام شہریوں کو نشانہ بنانے کا سلسلہ بند کیا جائے۔

تاحال فوج یا حکومت کی جانب سے ان واقعات پر کوئی باضابطہ بیان سامنے نہیں آیا۔