عدن میں صدارتی محل پر حوثی میزائل حملہ، 5 افراد ہلاک اور 16 زخمی، یمنی حکومت

عدن(ڈیلی اردو)یمن کی حکومت نے دعویٰ کیا ہے کہ جنوبی شہر عدن میں صدارتی کمپلیکس قصر المعاشیق پر حوثی باغیوں کے میزائل حملے میں 5 افراد ہلاک اور 16 زخمی ہوگئے۔ حکام کے مطابق ہلاک اور زخمی ہونے والوں میں کمپلیکس کی سکیورٹی پر مامور اہلکار اور شہری ملازمین شامل ہیں۔

اسکائی نیوز عربیہ کے مطابق یمن کے وزیر صحت قاسم محمد بحیبح نے سوشل میڈیا پر جاری بیان میں جانی نقصان کی تصدیق کی۔ ان کا کہنا تھا کہ حملہ سرکاری کمپلیکس کو نشانہ بنا کر کیا گیا۔ یمنی حکومت نے اس واقعے کو دسمبر 2020 میں عدن کے ہوائی اڈے پر ہونے والے حملے سے مشابہ قرار دیا ہے۔

فرانسیسی خبر رساں ادارے اے ایف پی کے مطابق ایک یمنی وزیر نے بتایا کہ حوثیوں نے سعودی حمایت یافتہ درع الوطن فورسز کے مرکز پر تین میزائل داغے، جبکہ صدارتی کمپلیکس میں سعودی قیادت میں قائم فورسز کے ہیڈکوارٹر کو دو میزائلوں سے نشانہ بنایا گیا۔ دوسری جانب حوثی فوجی ترجمان یحییٰ سریع نے کہا کہ ان کی فورسز نے عدن میں سعودی فوجی آپریشنز کے مرکز کو نشانہ بنایا۔

رپورٹس کے مطابق حوثی باغیوں نے یمن کے شہر مأرب پر بھی متعدد بیلسٹک میزائل داغے، جبکہ تعز شہر کے مغربی اور جنوبی مضافات میں حوثیوں اور حکومتی فورسز کے درمیان جھڑپیں جاری ہیں۔ تعز کے اطراف لڑائی اور شہر کی ناکہ بندی کے باعث ہزاروں خاندان نقل مکانی کرچکے ہیں، جبکہ خوراک اور دیگر بنیادی ضروریات کی فراہمی بھی متاثر ہونے کی اطلاعات ہیں۔

یمن کے وزیراعظم شائع الزندانی نے کہا ہے کہ حکومت شہریوں کے درمیان رہ کر اپنی ذمہ داریاں ادا کرتی رہے گی۔ یمن میں حالیہ لڑائی کے دوران مختلف محاذوں پر حملوں میں اضافے کے باوجود زمینی صورتحال کی آزادانہ تصدیق مشکل ہے۔