پاکستان سعودی عرب کی سلامتی اور علاقائی سالمیت کے تحفظ میں ساتھ دے گا، شہباز شریف

اسلام آباد(ڈیلی اردو) وزیراعظم شہباز شریف نے سعودی عرب کے ساتھ مضبوط دفاعی، معاشی اور سفارتی تعلقات برقرار رکھنے کے عزم کا اظہار کرتے ہوئے کہا ہے کہ پاکستان مملکت کی خودمختاری، سلامتی اور علاقائی سالمیت کے تحفظ کے لیے اس کے شانہ بشانہ کھڑا ہے۔

وزیراعظم سے سعودی عرب کے نئے تعینات ہونے والے سفیر ڈاکٹر راجح طامی البقمی نے ملاقات کی۔ شہباز شریف نے سفیر کا خیرمقدم کرتے ہوئے انہیں نئی ذمہ داریاں سنبھالنے پر مبارکباد دی اور دونوں ممالک کے دیرینہ برادرانہ تعلقات کو مزید وسعت دینے کی خواہش ظاہر کی۔

ملاقات کے دوران وزیراعظم نے سعودی عرب پر حوثی باغیوں کے حالیہ حملوں کی مذمت کی اور کہا کہ ان حملوں میں قیمتی جانوں کا نقصان ہوا جبکہ پاکستانی شہریوں سمیت متعدد بے گناہ افراد زخمی ہوئے۔ انہوں نے اس بات پر زور دیا کہ پاکستان اور سعودی عرب مشکل حالات میں ہمیشہ ایک دوسرے کے ساتھ کھڑے رہے ہیں۔

شہباز شریف نے کہا کہ دونوں ممالک کے درمیان اسٹریٹجک باہمی دفاعی معاہدہ اور مکہ مشترکہ دفاعی اتحاد دوطرفہ تعلقات میں اہم سنگ میل ہیں، جو علاقائی امن و سلامتی کے لیے مشترکہ عزم کی عکاسی کرتے ہیں۔ انہوں نے مختلف شعبوں میں تعاون بڑھانے اور موجودہ ادارہ جاتی رابطوں کو مزید مضبوط بنانے کے عزم کا بھی اعادہ کیا۔

وزیراعظم نے پاکستان کے لیے طویل مدتی اقتصادی اور مالی معاونت پر سعودی قیادت کا شکریہ ادا کیا اور سعودی سفیر کو یقین دلایا کہ دونوں ممالک کے تعلقات کو مزید مستحکم کرنے کے لیے پاکستان بھرپور تعاون جاری رکھے گا۔