مصر کی عدالت کا 35 اداروں اور 36 افراد کو پانچ سال کے لیے دہشتگردی کی فہرستوں میں شامل کرنے کا فیصلہ

قاہرہ (ڈیلی اردو) مصر کی ایک فوجداری عدالت نے 35 اداروں اور 36 افراد کو دہشتگردی سے متعلق فہرستوں میں پانچ سال کے لیے شامل کرنے کا فیصلہ کیا ہے۔ فہرست میں یورپ کے متعدد مسلم ادارے، مذہبی تنظیمیں اور مختلف کونسلیں بھی شامل ہیں، جن میں مجلس مسلمی یورپ نمایاں ہے۔

مصری میڈیا رپورٹس کے مطابق قاہرہ کی فوجداری عدالت کے بدر سرکٹ نے یہ فیصلہ مقدمہ نمبر 11108 برائے 2026 میں سنایا۔ فیصلے کے تحت 35 اداروں کو دہشتگرد تنظیموں جبکہ 36 افراد کو دہشتگردوں کی فہرست میں شامل کیا گیا ہے۔ یہ فیصلہ 10 نومبر 2026 کو سرکاری گزٹ ’’الوقائع المصریہ‘‘ کے شمارہ نمبر 250 میں شائع کیا گیا۔

فہرست میں مجلس مسلمی یورپ اور اس سے وابستہ مختلف شاخوں کے علاوہ فرانس کے مسلم ادارے، برطانیہ کی اسلامی لیگ، سوئٹزرلینڈ کی مسلم لیگ، جرمنی کی اسلامی تنظیم اور سویڈن و اٹلی کی اسلامی تنظیمیں شامل ہیں۔

اس کے علاوہ یورپی کونسل برائے فتویٰ و تحقیق، یورپی کونسل برائے ائمہ، یورپی مسلم فیملی کونسل، یورپی قرآن کونسل، یورپی مسلم خواتین کونسل، یورپی اسلامی طلبہ فورم اور یورپی انسٹی ٹیوٹ برائے ہیومینٹیز کے مختلف مراکز بھی فہرست میں شامل کیے گئے ہیں۔

رپورٹس کے مطابق 36 افراد کے نام بھی فیصلے میں درج ہیں، تاہم دستیاب اطلاعات میں تمام افراد کی مکمل تفصیلات سامنے نہیں آئیں۔ ان میں انس اسامہ توفیق التکریتی، ابراہیم فاروق محمد الزیات، عبدالعزیز محمد عبدالعزیز ابراہیم المعروف حمزہ کرکماز، حسین محمد محمد محمد حلاوہ اور وسام البردویل کے نام شامل ہیں۔

یہ فیصلہ مصر کے داخلی قانونی دائرہ اختیار کے تحت کیا گیا ہے۔ اس لیے ان اداروں اور افراد کی مصری فہرست میں شمولیت کو خودبخود یورپی یا عالمی سطح پر دہشتگرد قرار دیے جانے کے مترادف نہیں سمجھا جا سکتا۔