سعودی عرب میں میزائلوں اور ڈرون حملے کی کوشش ناکام بنانے کا دعویٰ، ریاض سمیت تین علاقوں کو نشانہ بنانے کی کوشش

ریاض (ڈیلی اردو) سعودی عرب کی قیادت میں قائم فوجی اتحاد نے دعویٰ کیا ہے کہ اس کے فضائی دفاعی نظام نے ملک کے مختلف علاقوں کی جانب داغے گئے تین میزائل اور ایک ڈرون روک کر تباہ کر دیا۔ ان میں دو میزائل دارالحکومت ریاض جبکہ ایک بیلسٹک میزائل جنوبی سعودی عرب کی جانب داغا گیا تھا، جبکہ ڈرون کو مشرقی صوبے کی فضائی حدود میں نشانہ بنایا گیا۔

اتحاد کے ترجمان میجر جنرل ترکی المالکی کے مطابق ریاض کی جانب آنے والے میزائلوں میں ایک بیلسٹک اور دوسرا کروز میزائل تھا، جنہیں فضائی دفاعی نظام نے فضا میں ہی تباہ کردیا۔ ترجمان نے جنوبی علاقے کی جانب داغے گئے ایک اور بیلسٹک میزائل کو بھی روکنے کا دعویٰ کیا۔ سعودی حکام نے ان حملوں کا الزام یمن کے ایران نواز حوثی باغیوں پر عائد کیا ہے۔

خبر رساں ادارے رائٹرز کے مطابق سعودی شہری دفاع نے ریاض میں فضائی خطرے سے متعلق ہنگامی انتباہ جاری کیا تھا، جبکہ جنوب مغربی شہروں ابہا اور خمیس مشیط میں بھی شہریوں کو خبردار کیا گیا۔ بعد ازاں حکام نے بتایا کہ خطرہ ٹل گیا ہے۔ دوسری جانب فرانسیسی خبر رساں ادارے اے ایف پی کے مطابق ریاض میں دھماکوں کی آوازیں بھی سنی گئیں اور شہریوں کو محفوظ مقامات پر منتقل ہونے کے پیغامات موصول ہوئے۔

مشرقی صوبے میں ڈرون مار گرائے جانے کی اہمیت اس لیے بھی زیادہ ہے کہ یہ سعودی عرب کا اہم معاشی اور توانائی کا مرکز ہے۔ ملک کے بیشتر تیل اور گیس کے ذخائر اسی خطے میں واقع ہیں، جبکہ عالمی توانائی کمپنی آرامکو کا مرکزی دفتر بھی یہاں قائم ہے۔ رائٹرز کے مطابق یہ خطہ ماضی میں بھی ڈرون اور میزائل حملوں کا نشانہ بنتا رہا ہے۔

یہ واقعات ایسے وقت میں پیش آئے ہیں جب سعودی عرب اور حوثی باغیوں کے درمیان کشیدگی میں اضافہ دیکھا جا رہا ہے۔ رائٹرز کے مطابق حوثی باغیوں نے حالیہ عرصے میں سعودی ہوائی اڈوں، بندرگاہوں اور تیل کی تنصیبات کو نشانہ بنانے کی کارروائیاں تیز کی ہیں، جبکہ سعودی عرب نے بھی یمن میں حوثی اہداف پر فضائی حملے کیے ہیں۔

دوسری جانب حوثی باغیوں کے زیر انتظام خبر رساں ادارے سبا نے دعویٰ کیا ہے کہ سعودی فضائی حملوں میں دارالحکومت صنعا کے ایک گیس اسٹیشن اور سرکاری تیل کمپنی کی عمارت کو نشانہ بنایا گیا، جس کے نتیجے میں آگ بھڑک اٹھی۔ تاہم سعودی حکام نے ان حملوں کی باضابطہ تصدیق نہیں کی، جبکہ جانی نقصان سے متعلق اطلاعات کی بھی آزادانہ تصدیق سامنے نہیں آئی۔

رائٹرز کے مطابق خطے میں کشیدگی کا ایک اہم پہلو باب المندب آبنائے کے قریب حوثی باغیوں کی حالیہ پیش قدمی بھی ہے۔ یہ گزرگاہ بحیرہ احمر اور خلیج عدن کو ملاتی ہے اور عالمی بحری تجارت کے لیے انتہائی اہمیت رکھتی ہے۔ اس علاقے میں فوجی سرگرمیوں میں اضافے سے بحری راستوں، توانائی کی ترسیل اور علاقائی سلامتی کے خدشات مزید بڑھ گئے ہیں۔