غزہ شہر پر اسرائیلی حملے، 59 فلسطینی ہلاک، 386 سے زائد زخمی

غزہ (ڈیلی اردو/ایجنسیاں) اسرائیلی فوج نے غزہ شہر میں اپنی زمینی کارروائیوں میں تیزی لاتے ہوئے شدید بمباری کی ہے جس کے نتیجے میں گزشتہ 24 گھنٹوں کے دوران کم از کم 59 فلسطینی ہلاک اور 386 سے زائد زخمی ہو گئے ہیں۔

حماس کے زیرانتظام وزارتِ صحت کے مطابق ہلاک ہونے والوں میں قحط اور غذائی قلت سے جاں بحق ہونے والے تین افراد بھی شامل ہیں جن میں ایک بچہ بھی ہے۔

عینی شاہدین کے مطابق غزہ شہر بدترین شیلنگ کی لپیٹ میں ہے۔ اسرائیلی فوج کا کہنا ہے کہ اس کارروائی کا مقصد شہر پر مکمل کنٹرول حاصل کرنا ہے، جسے وہ حماس کا ’آخری گڑھ‘ قرار دیتی ہے۔ فوجی اہلکاروں کا دعویٰ ہے کہ شہر میں اب بھی دو سے تین ہزار کے درمیان حماس کے جنگجو موجود ہیں۔

اسرائیلی وزیرِاعظم بنیامن نیتن یاہو نے غزہ شہر پر آپریشن کو حماس کے خلاف ’’فیصلہ کن مرحلہ‘‘ قرار دیا ہے۔ دوسری جانب اقوامِ متحدہ کے ایک انکوائری کمیشن نے الزام عائد کیا ہے کہ اسرائیل غزہ میں ’’نسل کشی‘‘ کر رہا ہے تاہم اسرائیل نے اس الزام کی تردید کی ہے۔

کینیڈا کی وزارتِ خارجہ نے غزہ شہر پر اسرائیل کے تازہ حملے کو ’’خوفناک‘‘ قرار دیتے ہوئے کہا ہے کہ یہ کارروائی انسانی بحران کو مزید سنگین کرنے اور یرغمالیوں کی رہائی کو خطرے میں ڈال سکتی ہے۔ وزارت نے اسرائیل پر زور دیا ہے کہ وہ بین الاقوامی قوانین کی پابندی کرے۔

اقوامِ متحدہ کی ریلیف اینڈ ورکس ایجنسی (یو این آر ڈبلیو اے) کے مشیر عدنان ابو حسنہ نے خبردار کیا ہے کہ دس لاکھ سے زیادہ فلسطینیوں کو 35 مربع کلومیٹر سے کم علاقے میں زبردستی دھکیلا جا رہا ہے، جو تقریباً 20 لاکھ افراد کو ایک چھوٹے سے علاقے میں محصور کرنے کے مترادف ہے۔

اسرائیلی فوج کے مطابق کارروائیوں کے آغاز سے اب تک 3 لاکھ 70 ہزار سے زیادہ فلسطینی غزہ شہر چھوڑ چکے ہیں جبکہ اب بھی شہر کے اندر 6 لاکھ سے زائد افراد موجود ہیں۔