فضائی حدود کیخلاف ورزی: لیبیا کا جنگی طیارہ تیونس میں اتار لیا گیا، پائلٹ گرفتار

تیونس شہر (ویب ڈیسک) تیونس کی فضائیہ نے لیبیا کا ایک جنگی طیارہ فضائی حدود کی خلاف ورزی پر ملک میں اتارنے کے بعد پائلٹ کو حراست میں لے لیا ہے۔

غیر ملکی خبررساں ادارے کے مطابق لیبیا کی قومی فوج کا ایک جنگی طیارہ سوموار کے روز پڑوسی ملک تیونس کی فضائی حدود میں داخل ہوا جو مدنین ریاست میں رجیجن کے علاقے بنی خداش کے مقام پر اتار لیا گیا۔

تیونس کی فوج نے لیبی جنگی طیارے کے ہواباز کو گرفتار کرکے اس سے تفتیش شروع کردی۔

سوشل میڈیا پر تیونس میں اتارے گئے لیبیا کے طیارے کی تصاویر بھی شائع کی گئیں۔ سخوئی جنگی طیارہ میزائل سے لیس تھا۔ کہا جارہا ہے کہ طیارے کو فنی خرابی کی وجہ سے تیونس میں اتارا گیا، اس طیارے کے پیچھے ایل 39′ طیارہ بھی جنوبی علاقوں میں ایک فضائی مشن پر تھا جو مغرب میں واقع اپنے اڈے کی طرف واپس لوٹ گیا۔

واضح رہے کہ لیبیا میں جنرل خلیفہ حفتر کی ماتحت فوج گذشتہ اپریل سے دارالحکومت طرابلس میں عالمی سطح پر تسلیم شدہ قومی وفاق حکومت کا تختہ الٹنے اور اس کی حامی شدت پسند ملیشیاﺅں کو وہاں سے بے دخل کرنے کے لیے آپریشن جاری رکھے ہوئے ہے۔