فلپائن میں جھڑپ کے دوران 5 باغی ہلاک، ایک فوجی زخمی

منیلا (ڈیلی اردو) فلپائن کے فوجی دستوں نے ملک کے وسطی صوبے بوہول میں جھڑپ کے دوران 5 مشتبہ باغیوں کو ہلاک کر دیا ہے۔

فلپائنی فوج نے بتایا کہ یہ مسلح جھڑپ منگل کے روز مقامی وقت کے مطابق صبح 5 بجکر 30 منٹ پر اس وقت شروع ہوئی جب فوجیوں کا “بیلار” قصبے کے نواح میں نیو پیپلز آرمی( این پی اے) کے کم از کم 11 ممبران سے تصادم ہوا۔ فوج نے مزید بتایا ہے کہ اس لڑائی میں ایک فوجی بھی زخمی ہوا ہے۔

فوج نے بتایا کہ ایک گھنٹے تک جاری رہنے والی اس لڑائی کے بعد فوجیوں نے ایک ایم 16 خودکار رائفل، ایک پستول، ایک گولیوں کا پٹہ، ایک دستی بم اور 30 گولیاں برآمد کی ہیں۔

فلپائن کے صدر روڈریگو دوتیرتے نے 2016ء میں اقتدار میں آنے کے بعد دہائیوں پرانی شورش کے خاتمے کیلئے بات چیت کا آغاز کیا تھا لیکن یہ مذاکرات ناکام ہو گئے تھے۔

این پی اے کے باغی 1969ء کے بعد سے اب تک حکومت سے برسر پیکار ہیں۔ انہوں نے دیہی علاقوں میں اپنے حملوں اور چھوٹے پیمانے پر فوج کے ساتھ جھڑپوں پر توجہ مرکوز کی ہوئی ہے۔