بلوچستان : واشک میں سیکیورٹی فورسز کا آپریشن، 3 دہشتگرد ہلاک

واشک (ڈیلی اردو) بلوچستان کے ضلع شورش زدہ واشک کی تحصیل بسیمہ کے علاقے پارہ بجڑ میں سیکیورٹی فورسز نے انٹیلی جنس معلومات کی بنیاد پر کارروائی کرتے ہوئے 3 دہشتگردوں کو ہلاک کردیا۔

ذرائع کے مطابق علاقے میں 6 سے 8 دہشتگردوں کی موجودگی کی اطلاع پر پاٹک میں تعینات سیکیورٹی فورسز نے فوری کارروائی کرتے ہوئے نشاندہی کیے گئے مقام کی جانب پیش قدمی کی اور آپریشن شروع کیا۔

اس دوران سیکیورٹی فورسز اور دہشتگردوں کے درمیان شدید فائرنگ کا تبادلہ ہوا، جس کے نتیجے میں 3 دہشتگرد ہلاک ہوگئے۔ فورسز نے ہلاک دہشتگردوں کی لاشیں تحویل میں لے لیں۔

ہلاک دہشتگردوں میں نجم الدین ولد علی حسن، سکنہ شیرینزا، اور عدنان ولد جلال الدین، سکنہ نوشکی شامل ہیں، جبکہ تیسرے دہشتگرد کی شناخت کا عمل جاری ہے۔

سیکیورٹی فورسز کے مطابق کارروائی کے دوران ہلاک دہشتگردوں کے قبضے سے بھاری مقدار میں اسلحہ اور گولہ بارود بھی برآمد کیا گیا۔