لندن: فلسطین کے احتجاج میں گریٹا تھنبرگ گرفتار

لندن (ڈیلی اردو) برطانیہ میں انسانی حقوق کے گروپ ڈیفینڈ آور جیوریز کے مطابق سویڈن کی ماحولیاتی کارکن گریٹا تھنبرگ کو لندن میں فلسطین کے حق میں احتجاج کے دوران گرفتار کر لیا گیا۔

اطلاعات کے مطابق گریٹا تھنبرگ اس وقت حراست میں لی گئیں جب وہ ایک پلے کارڈ اٹھائے ہوئے تھیں، جس میں فلسطین ایکشن سے منسلک قیدیوں کی حمایت ظاہر کی گئی تھی۔ فلسطین ایکشن کو برطانوی حکومت نے کالعدم دہشت گرد تنظیم قرار دیا ہوا ہے۔

سٹی آف لندن پولیس کے ترجمان نے بتایا کہ اس سے قبل دو افراد کو ایک عمارت پر سرخ پینٹ پھینکنے کے الزام میں گرفتار کیا گیا تھا۔ پولیس کے بیان کے مطابق، ’’کچھ دیر بعد ایک 22 سالہ خاتون بھی موقع پر پہنچی، جنہیں کالعدم تنظیم (فلسطین ایکشن) کی حمایت میں مواد دکھانے پر دہشت گردی ایکٹ 2000 کی شق 13 کے تحت گرفتار کیا گیا۔‘‘
 

ڈیفینڈ آور جیوریز نے کہا کہ یہ عمارت ایک انشورنس کمپنی کے دفاتر پر مشتمل تھی، جو ان کے مطابق اسرائیلی دفاعی کمپنی ایلبٹ سسٹمز کے برطانوی ذیلی ادارے کو خدمات فراہم کرتی ہے۔