لندن: یہودی یادگار سے متعلق مجرمانہ واقعے کی انسداد دہشت گردی پولیس کی تحقیقات

لندن (ڈیلی اردو) برطانوی دارالحکومت کی پولیس نے منگل 28 اپریل کے روز بتایا کہ اس کی انسداد دہشت گردی کی فورس کی طرف سے اس مجرمانہ واقعے کی چھان بین کی جا رہی ہے، جس میں شمالی لندن میں ایک یادگاری دیوار کو نقصان پہنچانے کی کوشش کی گئی تھی۔

لندن کے اس علاقے میں یہودی برادری کے ارکان کافی بڑی تعداد میں رہتے ہیں اور وہاں جس دیوار کو نقصان پہنچانے کی کوشش کی گئی، وہ ایران میں اس کریک ڈاؤن میں مارے جانے والے افراد کی یاد میں تعمیر کی گئی تھی، جس سے قبل وہاں ہونے والے ملک گیر حکومت مخالف احتجاجی مظاہروں میں اسی سال جنوری میں سینکڑوں افراد مارے گئے تھے۔

برطانیہ میں پیش آنے والا یہ واقعہ یہودیوں یا ان کی املاک سے متعلق مجرمانہ واقعات کے سلسلے کی تازہ ترین کڑی ہے۔ لندن کی میٹروپولیٹن پولیس نے بتایا کہ اس واقعے کو ابھی تک کوئی دہشت گردانہ واقعہ نہیں سمجھا جا رہا، تاہم اس کی چھان بین انسداد دہشت گردی کی ذمے دار پولیس کے ماہرین  کی طرف سے کی جا رہی ہے۔

لندن کے گولڈرز گرین نامی علاقے میں اس میموریل وال کو نقصان پہنچانے کا واقعہ پیر 27 اپریل کو پیش آیا تھا۔

لندن پولیس کے ڈیٹیکٹیو چیف سپرنٹنڈنٹ لُوک ولیمز نے بتایا کہ گولڈرز گرین نامی علاقے میں حالیہ ہفتوں میں یہودیوں یا ان کی املاک کے خلاف جرائم کے کئی واقعات پیش آئے ہیں اور گزشتہ ایک ماہ میں دوران تفتیش دو درجن سے زائد افراد کو حراست میں بھی لیا جا چکا ہے۔