لوئر دیر اور بنوں میں سیکیورٹی فورسز پر ڈرون اور فائرنگ کے واقعات، امن کمیٹی کا رکن ہلاک

پشاور (ڈیلی اردو رپورٹ) پاکستان کے شورش زدہ صوبے خیبر پختونخوا کے اضلاع لوئر دیر اور بنوں میں دہشتگردوں کے خلاف سیکیورٹی فورسز کی کارروائیاں جاری ہیں۔ دونوں اضلاع میں گزشتہ 24 گھنٹوں کے دوران فائرنگ، ڈرون حملے اور سرچ آپریشنز کی اطلاعات ملی ہیں۔

دیر لوئر

ضلع دیر لوئر کی تحصیل میدان کے علاقے درہ اطرافی میں منگل اور بدھ کی درمیانی شب نامعلوم مسلح افراد نے سابق رکن امن کمیٹی حاجی اعظم خان پر فائرنگ کر کے انہیں ہلاک کر دیا۔

پولیس کے مطابق فائرنگ کا واقعہ رات تقریباً ایک بجے پیش آیا، جب حاجی اعظم خان اپنے گھر کے صحن میں موجود تھے۔ اسی دوران گھر کی چھت پر موجود حملہ آوروں نے اندھا دھند فائرنگ کی، جس سے وہ شدید زخمی ہوگئے۔ انہیں قریبی اسپتال منتقل کیا گیا، تاہم وہ زخموں کی تاب نہ لاتے ہوئے دم توڑ گئے۔

واقعے کے بعد علاقے میں خوف و ہراس پھیل گیا۔ اطلاع ملتے ہی پولیس کی بھاری نفری جائے وقوعہ پر پہنچی اور علاقے کو گھیرے میں لے کر شواہد اکٹھے کیے۔ پولیس نے نامعلوم حملہ آوروں کے خلاف مقدمہ درج کر کے تحقیقات شروع کر دی ہیں۔

پولیس حکام کے مطابق واقعے کی وجوہات جاننے کے لیے مختلف پہلوؤں سے تحقیقات جاری ہیں۔ مقامی افراد کے مطابق حالیہ دنوں میں علاقے میں امن قائم تھا، تاہم اس واقعے نے ایک بار پھر خوف کی فضا پیدا کر دی ہے۔

علاقہ مکینوں نے حکومت اور قانون نافذ کرنے والے اداروں سے مطالبہ کیا ہے کہ ملزمان کو جلد از جلد گرفتار کر کے انصاف کے کٹہرے میں لایا جائے۔

حاجی اعظم خان کی نمازِ جنازہ ان کے آبائی علاقے میں ادا کی گئی، جس میں عوام، عمائدین اور سیاسی و سماجی رہنماؤں کی بڑی تعداد نے شرکت کی۔ بعد ازاں انہیں مقامی قبرستان میں سپرد خاک کر دیا گیا۔

بنوں

دوسری جانب ضلع بنوں میں دہشتگردوں کے خلاف سیکیورٹی فورسز کی کارروائیاں جاری ہیں۔

ذرائع کے مطابق تھانہ کینٹ کی حدود ممند خیل میں ایک کواڈ کاپٹر ڈرون حملہ کیا گیا، جو مسجد کے اندر چھپے دہشتگردوں کو نشانہ بنانے کے لیے کیا گیا تھا۔ پولیس ذرائع کے مطابق اس حملے میں ایک دہشتگرد کے زخمی ہونے کی اطلاعات موصول ہوئی ہیں۔

اسی روز جانی خیل کے علاقے میں دہشتگردوں نے مالی خیل چیک پوسٹ پر حملہ کیا، تاہم سیکیورٹی فورسز نے بروقت جوابی کارروائی کرتے ہوئے حملہ ناکام بنا دیا۔

ذرائع کے مطابق فائرنگ کے تبادلے کے بعد حملہ آور فرار ہو گئے، جبکہ فورسز نے علاقے کو گھیرے میں لے کر سرچ آپریشن شروع کر دیا ہے۔

سیکیورٹی ذرائع کا کہنا ہے کہ فورسز کسی بھی ممکنہ خطرے سے نمٹنے کے لیے ہائی الرٹ ہیں، اور علاقے میں دہشتگردوں کے نیٹ ورک کو مکمل طور پر ختم کرنے کے لیے آپریشنز میں تیزی لائی جا رہی ہے۔