لکی مروت میں تخریب کاری کا بڑا منصوبہ ناکام

لکی مروت (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت میں پولیس اور بم ڈسپوزل اسکواڈ نے دہشت گردی کا منصوبہ ناکام بنا دیا۔

پولیس کے مطابق میانوالی شاہراہ پر نالہ پل سے منسلک 40 کلو بارودی مواد پر مشتمل ریموٹ کنٹرول بم ناکارہ بنا دیا گیا۔ کارروائی پولیس اور بم ڈسپوزل اسکواڈ نے مشترکہ طور پر کی۔ 

حکام کے مطابق شرپسندوں نے بم عوام کو نشانہ بنانے کے لیے انتہائی اہم مقام پر نصب کیا تھا۔ اس مقام کے بالمقابل اسکولز اور سرحد انسٹیٹیوٹ آف ایجوکیشن اینڈ ریسرچ واقع ہیں۔

شرپسندوں کی منصوبہ بندی ناکام بنانے پر آئی جی پولیس خیبر پختونخوا ذوالفقار حمید نے لکی مروت پولیس اور بم ڈسپوزل اسکواڈ کو شاباش دی، جبکہ اہل علاقہ نے بھی پولیس کو خراج تحسین پیش کیا۔

آئی جی خیبر پختونخوا ذوالفقار حمید نے کہا کہ فرض کی راہ میں جان ہتھیلی پر رکھ کر معصوموں کی جان بچانے والے اصل ہیروز ہیں۔ انہوں نے عوام سے اپیل کی کہ وہ اپنے درمیان چھپی کالی بھیڑوں کی نشاندہی کریں کیونکہ دہشت گردوں کا مقصد صرف خوف و ہراس اور انتشار پھیلانا ہے۔

پولیس کے مطابق ڈی پی او لکی مروت نذیر خان کو خفیہ اطلاع ملی تھی کہ نالہ پل لکی میانوالی روڈ پر شرپسند عناصر نے بم نصب کر رکھا ہے، جس پر تھانہ سٹی پولیس نے موقع پر پہنچ کر علاقے کی ناکہ بندی کی۔

بعد ازاں پولیس اور بم ڈسپوزل اسکواڈ نے انتہائی حکمت عملی اور جدید آلات کے ذریعے دیسی ساختہ آئی ای ڈی ریموٹ کنٹرول بم ناکارہ بنا دیا۔ حکام کے مطابق بم ایک ڈرم میں تیار کیا گیا تھا جس میں 40 کلو سے زائد بارودی مواد استعمال ہوا۔ اس کے علاوہ دو ڈیٹونیٹر، 12 والٹ بیٹری اور سرکٹ بھی برآمد کیے گئے۔