لکی مروت میں گولیوں سے چھلنی تین نامعلوم افراد کی لاشیں برآمد

لکی مروت (ڈیلی اردو رپورٹ) پاکستان کے صوبہ خیبر پختونخوا کے ضلع لکی مروت کے مختلف علاقوں سے گولیوں سے چھلنی تین نامعلوم افراد کی لاشیں برآمد ہوئی ہیں۔

پولیس کے مطابق تھانہ گمبیلا کی حدود میں واقع علاقے شاگئی سے دو افراد کی لاشیں برآمد ہوئیں، جن پر گولیوں کے نشانات موجود تھے۔

پولیس کے مطابق اسی طرح تھانہ غزنی خیل کی حدود میں عصمت آباد کے قریب کھیتوں سے بھی ایک شخص کی گولیوں سے چھلنی لاش ملی ہے۔

پولیس کا کہنا ہے کہ تینوں مقتولین کی تاحال شناخت نہیں ہوسکی، جبکہ لاشوں کو ضروری قانونی کارروائی اور شناخت کے لیے ہسپتال منتقل کردیا گیا ہے۔

پولیس حکام کے مطابق تینوں افراد کو کہاں اور کس وجہ سے قتل کیا گیا، اس حوالے سے تحقیقات شروع کردی گئی ہیں۔ واقعے کے مختلف پہلوؤں کا جائزہ لیا جا رہا ہے اور مقتولین کی شناخت کے لیے بھی کوششیں جاری ہیں۔

پولیس نے جائے وقوعہ سے شواہد اکٹھے کرلیے ہیں جبکہ لاشوں کی شناخت اور قتل میں ملوث افراد کا سراغ لگانے کے لیے مزید تحقیقات جاری ہیں۔