مردان سے کالعدم تنظیم کا انتہائی مطلوب دہشت گرد گرفتار

مردان (بیورو رپورٹ) مردان پولیس نے کامیاب کارروائی کرتے ہوئے کالعدم تنظیم کے انتہائی مطلوب دہشت گرد کو زخمی حالت میں گرفتار کرلیا۔

خیبر پختونخوا حکومت نے گرفتار دہشت گرد کی سر کی قیمت 50 لاکھ روپے مقرر کی تھی۔

تفصیلات کے مطابق تھانہ کاٹلنگ پولیس نے مین کاٹلنگ روڈ پرفرش کے مقام پر ناکہ بندی کی تھی اس دوران مشتبہ تیز رفتار کار کو روکنے کا اشارہ کیا تو کار سوار نے رکنے کی بجائے پولیس پارٹی پر فائرنگ شروع کردی۔

پولیس کے مطابق پولیس پارٹی نے حق حفاظت خود اختیاری اور ملزم کی گرفتاری کی خاطر جوابی کارروائی میں فائرنگ کرنے والے شخص کو زخمی حالت میں گرفتار کرلیا۔

گرفتار ملزم کی شناخت ارشاد ولد سردار حسین سکنہ سکندرے مردان سے ہوئی جو کہ سی ٹی ڈی کو دہشت گردی، قتل و اقدام قتل کے متعدد مقدمات میں مطلوب تھا۔

ملزم کی سر کی قیمت حکومت کی طرف سے 50 لاکھ مقرر کی گئی تھی۔

گرفتار دہشت گرد سے قبضے سے دو عدد ہینڈ گرینڈ، ایک عدد نائن ایم ایم پستول اور متعدد کارتوس برآمد کرلئے۔

پولیس نے مزید معلومات حاصل کرنے کے لیے ملزم کو نامعلوم مقام پر منتقل کر دیا۔

گرفتار دہشت گرد سے تفتیش کی جارہی ہے اور اہم انکشافات متوقع ہیں۔