میانمار میں جنگی باقیات کا بارودی مواد پھٹ گیا، 10 طلبہ زخمی

میانمار(ڈیلی اردو)  ریاست رخائن کے ضلع مونگ ڈاؤ کے علاقے اِن ڈِن گاؤں میں جنگ کے دوران باقی رہ جانے والے بارودی مواد کے دھماکے سے 10 بچے زخمی ہوگئے۔

مقامی ذرائع کے مطابق 20 اگست کو بچوں کو جنگی باقیات میں ملنے والا ایک بم نما مواد ملا، جس سے کھیلنے کے دوران اچانک دھماکا ہوگیا۔ واقعے میں کے جی سے پانچویں جماعت تک کے 10 طلبہ و طالبات زخمی ہوئے۔

ذرائع کا کہنا ہے کہ زخمی بچوں کی عمریں 5 سے 12 سال کے درمیان ہیں۔ زخمیوں میں اِن ڈِن گاؤں کے 5 جبکہ قریبی گاؤں پی یَون کے بھی 5 بچے شامل ہیں۔ زخمیوں میں سے 6 بچوں کی حالت زیادہ تشویشناک ہونے کے باعث انہیں اسپتال منتقل کیا گیا، جبکہ معمولی زخمی بچوں کا مقامی سطح پر علاج کیا گیا۔

مقامی افراد کے مطابق مونگ ڈاؤ میں ماضی کی شدید لڑائیوں کے باعث بارودی سرنگوں اور جنگی باقیات کا خطرہ بدستور موجود ہے۔ اگرچہ علاقے میں بارودی مواد صاف کرنے کی کارروائیاں جاری ہیں، تاہم تمام خطرناک مواد کو مکمل طور پر ختم نہیں کیا جاسکا۔

علاقہ مکینوں نے بچوں اور مقامی آبادی میں بارودی سرنگوں اور جنگی باقیات سے متعلق آگاہی بڑھانے اور مشتبہ مواد ملنے کی صورت میں اسے چھونے کے بجائے متعلقہ حکام کو اطلاع دینے کی ضرورت پر زور دیا ہے۔