نائیجیریا : مسجد پر مسلح افراد کا حملہ ، 60 سے زائد نمازی اغواء

ابوجا(ڈیلی اردو) نائیجیریا کے وسطی شمالی علاقے میں مسلح افراد نے نمازِ جمعہ کے دوران ایک مسجد پر دھاوا بول کر درجنوں نمازیوں کو اغوا کر لیا۔

پولیس کے مطابق حملہ آور ریاست نائجر کے علاقے بورگو کی دو دیہی بستیوں میں داخل ہوئے اور بعد ازاں ڈیکارا کے علاقے میں واقع ایک مسجد کو اس وقت گھیرے میں لے لیا جب وہاں نمازِ جمعہ ادا کی جا رہی تھی۔

پولیس ترجمان کے مطابق حملے کے دوران متعدد نمازیوں کو زبردستی اپنے ساتھ لے جایا گیا، جبکہ کچھ افراد جان بچانے کے لیے قریبی جنگلات کی جانب فرار ہوگئے۔ پولیس نے واقعے میں کسی ہلاکت کی اطلاع نہیں دی اور مغویوں کی تلاش اور حملہ آوروں کا تعاقب کرنے کے لیے مشترکہ سیکیورٹی ٹیمیں روانہ کر دی ہیں۔

مقامی حکام کے مطابق مغوی افراد کی تعداد کم از کم 60 بتائی جا رہی ہے، جبکہ بعض مقامی ذرائع نے یہ تعداد 60 سے 80 کے درمیان بتائی ہے۔ فرار ہونے کی کوشش کے دوران بعض افراد کے زخمی ہونے کی بھی اطلاعات ہیں۔

حکام کا کہنا ہے کہ دور دراز علاقوں سے لوگوں کی نقل مکانی اور دشوار گزار راستوں کے باعث مغویوں کی حتمی تعداد معلوم کرنے میں مشکلات پیش آ رہی ہیں۔

ابھی تک کسی تنظیم نے حملے کی ذمہ داری قبول نہیں کی اور پولیس نے بھی حملہ آوروں کی شناخت یا واقعے کے محرکات کے بارے میں حتمی معلومات جاری نہیں کیں۔

نائیجیریا کے شمالی علاقوں میں مسلح گروہوں کی جانب سے اغوا برائے تاوان کے واقعات پیش آتے رہے ہیں، جبکہ وسیع جنگلات اور دور دراز علاقوں میں محدود سیکیورٹی موجودگی کے باعث ایسے حملہ آوروں کے خلاف کارروائی ایک بڑا چیلنج ہے۔