وادی تیراہ: لشکر اسلام کی نئی پابندیاں، داڑھی مونڈنے اور نوجوانوں کے اجتماعات پر قدغن

واشنگٹن (ش ح ط)پاکستان کے صوبہ خیبر پختونخوا کے قبائلی ضلع خیبر کی وادی تیراہ کے برباغ بازار میں کالعدم تنظیم لشکر اسلام پاکستان نے حجاموں کی دکانوں پر تحریری پرچیاں آویزاں کر کے عوام کو سختی سے خبردار کیا ہے کہ داڑھی میں ڈیزائن بنانے اور منڈوانے پر پابندی عائد کر دی گئی ہے۔

مقامی ذرائع کے مطابق، لشکر اسلام کے مقامی قیادت نے بازار میں گشت کرتے ہوئے عوام کو براہ راست آگاہ کیا کہ آج سے حجاموں کو داڑھی کے مخصوص اسٹائل بنانے یا اسے منڈوانے کی اجازت نہیں ہوگی۔ اس کے علاوہ، تنظیم نے نوجوانوں کے اجتماعات پر بھی پابندی عائد کر دی ہے۔

تحریری حکم نامے میں کہا گیا ہے کہ نوجوانوں کو آئس نشہ کرنے، موٹر سائیکل پر آوارہ گردی سے گریز کرنا ہوگا، بصورت دیگر سخت سزائیں دی جائیں گی۔ مزید برآں، حکم نامے میں اشیائے خوردونوش کی قیمتوں میں کمی کرنے، لڑائی جھگڑوں سے اجتناب کرنے اور میموری کارڈ میں گانے ڈالنے سے بھی منع کیا گیا ہے۔

یہ تازہ ترین اقدامات وادی تیراہ میں شدت پسندوں کی مسلسل موجودگی اور ان کے اثر و رسوخ کو ظاہر کرتے ہیں، جہاں مقامی آبادی پر سخت سماجی ضابطے نافذ کیے جا رہے ہیں۔