پاکستان، سعودی عرب اور ترکیہ کا دفاعی معاہدہ کسی ملک کےخلاف جارحانہ کارروائی کےلئے نہیں، وزیراعظم شہباز شریف

اسلام آباد (ڈیلی اردو) پاکستان کے وزیراعظم شہباز شریف نے کہا ہے کہ پاکستان، سعودی عرب اور ترکیہ کے درمیان ہونے والے سہ فریقی دفاعی معاہدے کا مقصد کسی ملک کے خلاف جارحانہ کارروائی نہیں بلکہ خطے میں امن، استحکام، ترقی اور خوشحالی کو فروغ دینا ہے۔

کابینہ اجلاس سے خطاب کرتے ہوئے وزیراعظم نے کہا کہ پاکستان اور اس کی عوام سعودی عرب کے ساتھ دیرینہ برادرانہ تعلقات رکھتے ہیں اور حرمین شریفین کے تحفظ کے حوالے سے اپنی ذمہ داریوں سے ہمیشہ آگاہ رہے ہیں۔ انہوں نے بتایا کہ گزشتہ سال پاکستان اور سعودی عرب کے درمیان اس حوالے سے معاہدہ ہوا تھا، جسے حالیہ پیش رفت کے تحت ترکیہ کی شمولیت سے مزید وسعت دی گئی ہے۔

شہباز شریف نے کہا کہ تینوں ممالک کے درمیان دفاعی تعاون خطے کے امن کے ساتھ ساتھ مسلم امہ کے لیے بھی استحکام کا باعث بنے گا۔ انہوں نے معاہدے کی تکمیل پر نائب وزیراعظم اسحاق ڈار اور فیلڈ مارشل کو بھی مبارکباد پیش کی۔

وزیراعظم نے ملک میں دہشت گردی کے حالیہ واقعات کا ذکر کرتے ہوئے کہا کہ دہشت گردی کے خلاف جنگ میں پولیس اور سیکیورٹی فورسز کے اہلکاروں نے قیمتی جانوں کی قربانیاں دی ہیں۔ انہوں نے شہدا کے درجات کی بلندی اور لواحقین کے لیے صبر کی دعا بھی کی۔